Faasā ona la‘u ese le oneone i Vaisigano

E mae‘a le afā o Eveni ae faalauiloa loa foliga ua suia nei o se tasi o nofoaga o le taulaga, o le oneone tele lea ua to‘a ma aumai i tafega, ma ua tele le suiga o Vaisigano agai atu i Matautu i Apia ona o le tele o le oneone to‘a i lea itu o Apia. Ua fai ai taaloga a le tupulaga o le taulaga auā ua telē le matafaga i lea nofoaga.
E oo foi i le taitai o le Malo na ia ta‘ua o vaaiga nei sa amata mai ai lava le taulaga o Apia i tausaga e tele ua mavae, peitai o le tele o suiga o le talafatai o Apia ua mafua ai ona lē vaaia ni matafaga i lea itu ae o lea ua toe vaaia le mānu a‘e o le oneone uliuli lea i le tetele o tafega na molimauina i le faaiuga o le tausaga.
Ua lua nei masina talu ona iai le tapu mai i le mamalu o le atunuu ua la‘u le oneone lenei. Na vaaia loa le mānu ane o le oneone, tulai mai ai loa ma le faiga lea ua agai le toatele i lalo ane o le auala sima i Vaisigano ma amata ona la‘u le oneone mo le fausia o o latou fale. Ua faia se faatonuga a le Alii Palemia e taofia ai lenei faiga, peitai o loo vaaia pea le agai o aiga e faatino lea faiga e ui o lea ua solitulafono le la‘u o le oneone.
O le vaega o fuafuaga o le Taulaga a le Matagaluega o Punaoa Faalenatura ma le Siosiomaga, le PUMA, ua ave i ai le vaaiga o nei gaioiga ma le faia o faasalaga i soo se tasi e maua o la‘u le oneone mai i lea nofoaga, faapea foi le oneone ua mānu ane i Mulivai.
Faaalia e le sui o le PUMA na maua mo se faamatalaga o lenei tulafono fou na ta‘ua ai e Pela Savaiinaea, ua manino le faatonuga na sau sa‘o lava i le Taitai o le Atunuu ma ua iai foi faaaliga ua tatu‘i i nofoaga nei ua faasā ai le la‘u o le oneone, ae e foliga mai e lē o usitaia lava e le toatele nei faiga.
O lea la ua toe agai mai lapataiga a le Matagaluega ina ia utagia e le atunuu – o i latou ua molia ua tuu atu i le Ofisa o Leoleo i le faamautu ai lea o moliaga ua faia faasaga ia i latou, ae lē gata i lea o le faaauau ai luma o le Faamasinoga.
Mo le uta palapala poo le uta oneone uliuli e i le va o le $150-$200 i le uta ua faatau mai ai ma o le mafuaaga lava lea o le vaaia pea o le tele o aiga ua agai lava i matafaga eseese ma vaitafe auā le asu mai o le oneone ma le ave o maamaa mo a latou galuega, e ui e faasā e pulega a alii ma faipule o nuu, e faasā foi e le Malo.