Faasā ata tifaga “Agelu ma Temoni”, maaleale aafiaga Ekalesia Katoliko

Ua tapu pe faasa e le alii ofisa o loo vaaia le talafeagai o ata tifaga e maimoaina e le atunuu poo le principal censor a le Malo, susuga Leiataua Oloapu, ona faaali i Samoa le ata tifaga ua faaigoaina o Agelu ma Temoni poo Angels and Demons. Ua mafua ona faia lea faaiuga ona na faaalia e Leiataua, e maaleale tele aafiaga o le Ekalesia Katoliko o loo faamatala ai i lea ata tifaga fou sa fuafua e faaali i le fale tifaga o le Magik Cinema i le vaiaso nei.
O le tala o loo faatino i le ata tifaga e aafia tele ai talitonuga faalelotu e pei ona faaalia e le ofisa sinia e vaaia ata tifaga, ma e le tatau ona faaali ina nei avea ma mafuaaga e tupu ai ni lagona ilitata ma lagona faailogalanu o tagata talitonu o isi tapuaiga faasaga i le Ekalesia Katoliko.
O le Angels and Demons o se ata na faatino mai le tusi faitau na tusia e le alii tusitala Amerika o Dan Brown lea na ia tusia foi se isi tusi na faatino ai le ata tifaga o le Da Vinci Code, lea na faasa foi ona faaali e fale tifaga ma fale video i Samoa i le tolu tausaga talu ai. Na faaalia e Leiataua Oloapu, ua talia e le pulega o le faletifaga o le Magik Cinema lana faaiuga ma e le o iai so latou faamoemoe e toe apili le iuga ua faia i le ata.
E taofi eseese ma feteenai lagona o le mamalu o le atunuu i lenei faaiuga e pei foi ona sa faia i isi ata tifaga i ni tausaga e lei leva tele atu. E manatu nisi, e ui lava o loo iai se popolega ona o nisi o talitonuga faaekalesia ina nei faamanualia i nisi o vaega o loo faaalia i nei ata tifaga, ma avea ai ma itu e faasinosinolima pe ulagia ai foi na talitonuga faatapuaiga, peitai e manatu foi nisi, e sili mamao atu ona faaali nei ata o loo faaali mai ai talitonuga faalotu, nai lo le anoano o lapisi ma vaaiga mataga nei o loo tuufau ona faaaliali mai le tele o ata tifaga i nei ona po.
Ina ua fesiligia nisi taofi e tusa ai lava o lenei mataupu ua amata ona tulai soo mai si o tatou atunuu, na taua ai e nisi, e sili ai ona faaaliali mai ata tifaga na, aua afai e moni o mea tonu poo talitonuga moni na o loo iai i nisi tapuaiga, e pei ona faaata mai e nei ata tifaga, atonu foi la e iai se aoga, ina ia toe saili pe faamautinoa le tagata tapuai, pe o le mea moni lea o loo ia lagolagoina ma fiafia e talitonu i ai.
E sili atu lena, nai lo le taofi o ata nei, ae faataga le tele o ata o faiga ma amioga e matautia le mataga lea ua faigofie ona matamata i ai tagata uma aemaise fanau laiti ma le tupulaga, aua pe le o se tasi ea lea o pogai ua sasao faaafi ai le amioleaga sei tulou i lenei vaitaimi, ona ua fafaga le mafaufau ma loto i aso uma, i ata tifaga nei o loo faataga ona aumai i totonu o Samoa.