Na a‘e le faiva ole tamā ole teineitiiti 12 tausaga le matua, ona tuli lea e lona tamā e ave i‘a ole faiva e tuu ile pusaaisa ale aiga latou te tuaoi. Na taunuu le teineititi ma ia fafagu le tamaloa e ana le pusaaisa ae sa lē ala ane.
Na iloa ane ele atalii 21 tausaga le matua ole tamaloa le teineitiiti ona alu ane lea tuu i‘a ile aisa. Na toe foi le teineititi ilo latou fale ae nate leiloa oloo mulimuli atu le atalii ole tamaloa e ana le pusaaisa.
Na faaalia e leoleo i faamaumauga ale faamasinoga, na latalata atu loa le taulealea tago loa pupuni foliga ole teineititi ise solo ma oomi lona gutu ina ne‘i e‘e.
Na toso ele alii le teineititi ise togavao a‘o mau pea lona lima e taofi ai le solo male fofoga ole teineititi ia aua ai lava ne‘i maua se avanoa e valaau ai mo se fesoasoani.
Na faaoolima le alii ile teineititi ma ia mafai ai ona faataoto le teineititi i lalo ona ia faamalosi lea ma faia iai nisi gaioiga matagā. Na mafai ele teineititi ona ia faasaga tau atu ile malosi ole alii e iva tausaga e matua ai ile teineititi, ma faapena ona mafai ai ele teineititi ona sola ese ma e‘e agai ilo latou fale.
Na faafetaui mai e lona tina ma faamatala loa ele teineititi le mea na tupu ma faapea ona logo ai loa leoleo. Ole moliaga e tasi ole faiaiga fai faamalosi male moliaga ole faiaiga ma se teineitiiti laitiiti na ioeina ele alii o Faafetai Mafuie Saili Esekia sa faigaluega ise vaa fagota ae na tuli ma faamalolo ina ua molia e leoleo. Na uma ana aoga ile vasega tausaga 10 ma saili ai loa lana galuega, ma na faaalia i faamaumauga ale faamasinoga ose tagata talavou sa lima taumatau iai lona aiga.
Peitai na faamatala le alii ile faamasinoga sa ‘onā ile avamalosi ile taimi na ia faia ai le solitulafono. Peitai ole silasila ale faamasinoga e lē ose ‘alofaga le faasua‘avā ole taulealea. E valu tausaga male valu masina ua faasala ai ele faamasinoga le alii o Faafetai, ae ole teineititi ua nofo nei ile vaaiga ale faalapotopotoga ole Toomaga mo ē Puapuagatia.
O Iuni ole tausaga nei na tupu ai lenei solitulafono ma ua faasā ma tapu ele faamasinoga ona faailoa le aoga, le nuu male suafa o lē na aafia ile gaioiga ale taulealea ua amata tuli nei lona faasalaga ile toese i Tafaigata.
