E mautinoa sa fuafua lelei e le alii o Makesi ma lana manamea le tamaitai o Faith, ina ia faia le la osigafeagaiga o le faaipoipoga, i le Aso Toonai mulimuli o le tausaga na se‘i faatoa mavae atu nei, 2012.
O lea la toe Aso Toonai, aso 29 o Tesema 2012, na osia ai loa le feagaiga a le alii o Makesi ma le tamaitai o Faith , i le faipoipoga, i le taitaiga a le susuga ia Pastor Tuipalusami Mafoe o le Ekalesia Worship Centre i Kalaiesetete, faatasi ai ma le lagolagosua a le susuga ia Pastor Faleaoga Leota. O le alii faaipoipo o le alo o Fiu Laufa Sefo ma Avau Tito o Safotu ma Sili mai le motu tele i Salafai, a o le tamaitai faaipoipo o Faith e mai Samalaeulu ma Faiaai o le motu foi i Salafai.
Na faatumulia le faamoemoe o le ulugalii fou. O le tofa ia Sooalo Alatimu Alatimu na fai ma fofoga o le aso, a o le fetalaiga ia Lagaaia Fatu Timu na fai ma fofoga o le paia o aiga na lua auā tulaga masani i faaaloaloga i le aufaigaluega aemaise o le valaaulia sa faatasi ai. O le fofoga o le Ekalesia le susuga ia Samasoni Maka na fai ma sui o le Ekalesia ma le valaaulia e faafetaia faaaloaloga na maau i ai le paia i aiga na lua. Na taape a foi le aofia ma faalumaga ona o le tele o taumafa auā le aso fiafia o le ulugalii fou! MANUIA LE AIGA FOU!
