O le mae‘a ai o le galuega a faamasino i le po o le Aso Toonai 29 o Oketopa na filifilia ai se tasi e paleina le pale o le Miss Samoa Ausetalia. Na maualuga ai i le faatulagaina o togi ma faamanuiaina ai le tamaitai tauva numera lona lua o Mary Pakileata e iai ona pito ‘afa Samoa ma ‘afa Tonga. Na faatumulia le tauvaga i le mamalu o Samoa o alaala i Kuiniselani faapea aiga ma uo o nai tamaitai e malaga mai Niu Sa Uelese faapea ē na lagolagoinai latou uma nei.


Na amata faagasolo mai lenei faamoemoe i le aganuu ma le tauafiafi e pei ona auina atu i le lomiga talu ai.
O le tamaitai ua pale mai nei o Mary e mai le alalafaga o Saleimoa ma le motu o Tonga. Sa saunoa Mary na a‘oa‘oina mai o ia i le aganuu a Samoa ma le aganuu a Tonga, o se avanoa tāua lea e mafai ai ona ia a‘oa‘oina atu nisi o ia itu tāua i tamaiti Pasefika o lana vasega.
Ua taunuu lana miti sa ia tulimatai i ai ia avea o ia ma tamaitai lalelei o Samoa i Ausetalia nei e tautua i le atunuu i tu masani.
O faafiafiaga mālie sa malaga mamao mai le ausiva logologoa a le Delicious mai Niu Sila, faapea le Heilani PCYC Logan ma le tele o isi ausiva sa faafiafiaina le po.
O Fofoga o le po o le afioga ia Toleafoa Ian Asiata ma Eugenia McFall.

O tulaga na mautogia ai tamaitai uma sa tausinio:
MISS Samoa Ausetalia 2011/2012 – Mary Pakileata Tomasi Greatz
1st Runner up – Cara Hellesoe Gane
2nd Runner up – Tusitina Etimani
3rd Runner up – Domineaq Sassine
4th Runner up – Heidi Wilson
Miss Internet – Domineaq Sassine
Best Interview – Tusitina Etimani
Miss Charity – Heidi Wilson
Best Sarong – Mary Pakileata Tomasi Greatz
Best Traditional Wear – Mary Pakileata Tomasi Greatz
Best Talent – Mary Pakileata Tomasi Greatz
Best Puletasi – Mary Pakileata Tomasi Greatz

O le tamaitai o Heidi ua faapaleina nei i le Miss Charity Queen ma o le a sauni e malaga atu i Samoa faatasi ma le Miss Samoa ua pale mai i le taimi nei pe a aulia le tausaga fou.
Ua mae‘a nei le tausaga sa tautua ai Rebecca Sutherton ma ua toe malaga atu i lona aiga i Sini Niu Sa Uelese.