Tusa pe pagota, pe soloatoa ile falepuipui, ae lē o aveesea ai le tulaga o Filipaina o ia ole suli ole suafa Nuuialii o Faleula.
Ose faaeaea foi lea a lona aiga, ae o suli ma feoi ole suafa, e pei ona molimauina ile vaitau o aso fiafia na se’i mavae atu.
Ile talanoaga ma le tauaiga ae ose tasi foi o suli o le suafa matai Nuuialii o Faleula: “Ole tamalii lena o le suli ole matou aiga, e tupuga mai le tasi ole auso teine, ma e matuā telē lava lona agavaa ile suafa ua faaee atu iai, e ui lava ina iai ni tagata na fesiligia lena tulaga, peitai ole suli lava ole suli.”
Ole Afioga Filipaina o Faleatiu ma Faleula, ole isi lea o tamalii ole to’a 18 o alii ma tamaitai na ave iai le faamalumalu a o latou tauaiga i suafa matai. O suafa ia e iai le Nuuialii, Papalii, Seiuli ma le Galumalemana.
Molimauina o suli ma feoi o lea aiga mai atunuu i fafo, ma Samoa nei lea na faapale ai i suafa matai e pei ona ta’ua i luga, ile tuanai ai ole Kerisimasi.
Ole sauniga faapaia mo suafa matai, ole Nuuialii, Seiuli, Papalii ma Galumalemana na faia ile maota Samoa tele o Telea i Faleula.
Na ta’ua ele tauaiga ole nofo, ole faatagaga lava na avatu ile maota, na afua ai ona faia ai saofai. Ma ose tasi foi lea o foliga e atagia ai se nuu ae nofo fealofani, ma maopoopo ana mea fai. E afua mai pulega lelei ma ta’ita’iga a ē ua ave iai le faamalumaluga ma ē o tausia nei le nuu o Faleula.
Ile taimi ole ‘ava ole faapaiaga, na agia lava foi suaga e masani ai faamatai, e faatatau ile pale mai ai ole Susuga Filipaina ile suafa, ile taimi na tufa atu ai lana ‘ava taumafa.
E le o lilo foi ile tatou aufaitau, o lea tamalii oloo lauiloa lava lona suafa i tuua’iga o laau faasāina e pei ole maruana.
A’o lei taumafaina lana ‘ava ole nofo, na lologo tagata tapua’i i sana upu faamanuia, na ia ta’ua ai le fai lea ose aogā o lona matai faatauvaa ile afioaga. Peitai na lagona atu lava se tasi o faatalasua mai tua, “pau lava lou aogā ole aumai ole laau.” Sa lagona lava le magamaganū talitaliē o tagata e atagia ai lo latou talia atoatoa o agamālie ale nofo.
Peitai na taliē le au tapuai ile tali a le matai fou, “Pe a finagalo iai le tatou nuu, e sau lava le uta.”
O faatalasuaga e faamālie ai le taeao ua matagofie ise matati’a ua molimauina, i ia foi faiga matai o aso fiafia i Samoa, ole faaeaea ua ave ise soloatoa, ae ole tagata lava foi, ua sili ona lauiloa i talafaasolopito ole falepuipui i Tafaigata.
Peitai ole toe a’e mai o galuega ile uma ane ai o aso fiafia, na faatoa iloa ai, e sili atu le toatele o pagota na faataga e o e faiaso malolo i tua nai lo le numera sa faamaonia.
Na ta’ua ele paaga faamoemoeina, mai le 80 o pagota na faataga i tua, e na’o le 16 i latou sa ave iai le faamaoniga.
E lē o mautinoa ile taimi nei, pe o Filipaina le isi ole to’a 16 lea na faataga mo aso fiafia. Ae na ta’ua ele sui ole pulega, e masani ai lava ona faataga pagota e o i tua pe afai e iai ni mafuaaga tatau, e pei ose maliu o lona aiga, tamā poo le tina, poo se tasi ole fanau ma le toalua. Ae e iai lava foi ma se leoleo e faafeaoina pe leoleoina lena pagota.
Ole afioga a Filipaina, e molimauina lava le faafeao atu e leoleo ole falepuipui, i taimi e faagasegasea ai, ma avatu ile falema’i ole Tupua Tamasese Meaole i Motootua.
E oo ane foi ile taimi o aso malolo, oloo sailia pea pagota e toafā, lea e oo mai ile taimi na tusia ai lenei tala, ua toe toatasi oloo fai lava ana tafaoga o aso malolo, e lei maua foi e leoleo.
Ae oloo tumau pea lapataiga mo le atunuu lautele, e taumamao ma le pagota, ae ia vili leoleo pe a maua iai se faamatalaga.
Ole o i tua o pagota, e aunoa ma se faatagaga, lea na molimauina atu i lea lava taimi le osofai ai ole maota ole au CCK i Ululoloa.
E toalua na tofu ma aupega, naifi, ile taimi na o faamalosi ai ile maota o lea aiga. Ole leotetele ole feei a teine talavou e toalua nai le fale na toe sosola ese ai pagota i fafo ma le fale.
I faamaumauga a leoleo, e lē ose taimi muamua lea ua osofai ai e pagota e o i tua, fale ole lotoā ale CCK i Ululoloa, ma aafia ai soifua o lea aiga.
Ole taimi nei, ua amatalia galuega ole falepuipui i Tanumalala, ina ia saga taumamao ese ai pagota ma aiga mo le saogalemu o tagata lautele.
