“O ia le uluai tausala ua filifilia ina ua pasia le suiga fou i le igoa o le tauvaga”
O le tausala o Samoa le afioga Latafale Auvaa ua manumalo i le Tausala o Atumotu o le Pasefika, ma o ia le uluai tamaitai ua faapaleina ina ua suia le igoa o le tauvaga i le tausaga nei ma ua faaigoa ai o le Miss Pacific Islands.
O se faaiuga faigata na feagai ma faamasino i le po o le Aso Faraile ua mavae ina ua faagasolo le tauvaga, ona e lalelei ma agavaa uma tamaitai e toavalu sa tauva e aofia ai le tausala o Fiti, Nauru, Niue, Atu Kuki, Tonga, Papua Niu Kini, Amerika Samoa ma Samoa.
O Latafale o le suafa Sa‘otamaitai o le aiga Sa Matai‘a i Faleata, lea o loo suafa ai le tamaitai ua manumalo. O ia o se alo e faasino i le susuga Enosa Tololima Auvaa, o ona mātua o faifeau sa galulue i le ekalesia Metotisi i tausaga ua mavae, le susuga Tololima ma Sara Latafale Koria Auvaa.
O le tina o le afioga Latafale Auvaa o se tamaitai mai Niu Sila o Felicity. Na faaalia e mātua le agaga fiafia ona o le manumalo o lo la alo i le tauvaga, aemaise o se fiafiaga foi lea i le tapuaiga a ona aiga uma i Samoa ma Niu Sila aemaise o le atunuu atoa sa tapuaia lona faamoemoe.
O le manumalo o Latafale e mafai ona faapea, e tolu pale ua ia tauaveina. O le Tausala Samoa mai Niu Sila, Tausala o Samoa, ma le Tausala o Motu o le Pasefika. O lana saunoaga i le tufatufaina o faailoga o tamaitai uma na latou tauva, na ia faaalia ai lona agaga faafetai i tamaitai sa latou tauva ona e ui lava ina faapea o ia ua manumalo, ae e ao ona manatua e tamaitai uma, e iai se mea tāua na latou maua uma a o mafuta faatasi ma sauni i le tauvaga.
O se tamaitai kerisiano ona uiga e iloa i ana saunoaga, ona na te faamuamua le Atua ma o lona faamoemoe foi a o sauni i le tauvaga sa tuu i le Atua. E pei ona silafia o se tasi o uso o Latafale o se tamaitai pese lauiloa i le musika ua faafofoga i ai le atunuu ma le lalolagi i ana CD pese, le tamaitai o Sarah Jane Auvaa.
O lagona faaalia o isi tamaitai tauva sa latou faaalia ai foi le faafetai i le Malo o Samoa ma pulega o tagata tafafao i le talimalo ma le vaaia lelei o i latou a o faagasolo polokalame eseese sa auai, a o lumanai le po o le tauvaga.
O le taunuuga la o le faamoemoe ua sola ai Latafale ma faailoga e fā e ese mai le manumalo i le pale o le Tausala o Atumotu o le Pasefika. Na ia manumalo i le faailoga o le taleni pito lelei; o le faailoga o le lelei o le taliina o fesili; o le faailoga i le lelei o lana sarong, ma le faailoga o le lelei o lona laei faaleaganuu le traditional wear.
O le tausala mai le Atu Kuki na maua le tulaga lua poo le First Runner Up, pito i ai le tausala a Fiti i le tulaga tolu poo le Second Runner Up. O Amerika Samoa na tulaga fā poo le 3rd Runner Up ma le tausala mai Papua Niu Kini i le tulaga lima poo le Fourth Runner Up.
Na maua e le tausala mai Niue le faailoga o le Miss Personality poo le tausaafia, tausala o Nauru na maua le faailoga o le Miss Internet ma le tausala o Fiti na ia maua le Miss Photogenic poo le tausala ata lelei.
