Faapaiaina Timothy ma Lilian i le faaipoipoga i Melepone

I le susulu manaia o ave o le la lafoia le paolo o laau o faamalumalu i le siosiomaga, o loo tausani ma fetaliai manu felelei e faailoa galuega mamana a le Silisiliese, ua amata fetaufetuliai fanauiti ma sagisagi i le fiafia, ae toe meia le masaga ma pei a melotagi ina ua talie ane i ai papalagi o loo uulima ma fai le pikiniki (picnic). O le mālū o le fisaga na momolieseina le vevela ae molitai mai le sasala o le rosa ma le oketi o sosolo faasasasasa i le itu agavale, ua lafoia nofoa papae ma ie silika o teuteu ai i ave o le la, ona pei lea o ni taimane fepulafi ua selu ma toulu i le kapeta mūmū.

Ua tutulai le aofia ma le auvalaaulia a o ta le pese, ae mili faatatau i ai lima o le tama faaipoipo le alii o Timothy Poto Leota, ma tau tovā lana manava e tau tuleieseina le meia ma loimata.

Na lolofi ane tagata eseese o loo pueata ma tafafao i le felanulanuai o le togalaau i Fitzroy Garden, ma maitauina le lalelei o le solo a tamaitai Samoa o uosili ma aumeamamae.

Na molimoli faasolosolo mai e nai ona tuagane e toatolu le tamaitai faaipoipo lalelei ia Lilian, seia oo mai i si o latou
tamā o Victor, ma ia foai atu ai i le lima o Timothy ma osifeagaiga ai, i le silafaga
ati a le Atua, aemaise o le mamalu o le auvalaaulia ma Samoa na potopoto, ae tainane le Aufaigaluega Paia a le Atua ma le ofisa fai faaipoipoga si o la tamā faifeau le susuga ia Atapana Poe.

Ua faamaulu a la mama faaipoipo ae taotolua ma a la tautoga o le alofa ua moni. Na lologo laau o le faatoaga ina ua maona le patipati ma le tuu faaili o a la uo ma aiga ina ua saunoa le taitai o le sauniga, “Ua avea nei oulua o le tane ma le ava.”

Se ulugalii fou foi ina a lalelei ma malualii, o feofoofoaiga ma faamanuiaga na matie
ma maualuga atili ai le faamoemoe a o faagasolo puegaata i le togalaau lava i Fitzroy.

Na mae‘a le sauniga paia sosoo ma le taumafataga matagofie i le Pier 35 i Port Melbourne, na tali ai le sua ma taumamafa Samoa a o fafati fetaliai galu o le uafu, lasi le vaaiga i lea foi nofoaga tu matafaga.

O le fofoga malie o le po o le susuga ia Fuafiti Lawrence Fuaivaa mai le aai o Sini, o le musika na nafataulimaina e DJ RETEP ae lagolagosua e faafiafiaga eseese a alo ma fanau a aiga na lua.

O le alii faaipoipo o le alo o Mefiposeta ma Sesilia Fidow a o faavailolo le afioga ia Muliagatele ma le faletua ia Melisa Poto, ae o le tamaitai faaipoipo o le alo o Victor ma Lupeuluiva Sio mai Vaiusu ma Vailele.

Na ta‘ape fiafia le aofia ma le mama ua lomi ma le vaa ua goto. Ia manuia le ulugalii fou Tim ma Lilian, ma ia iai Keriso i o lua ala uma.

Le ulugalii fou ma le aiga o le alii faaipoipo

Le ulugalii fou o Timothy & Lilian