Ia outou o atu i nuu uma lava ma fai outou ma soo, ma talai le talalelei. O le susuga i le faafeagaiga ia Kelemete Moananu ma le faletua ia Faaulu Moananu o faifeau ia a le ekalesia fou, e sefulu ma le tasi matafale ua faapaiaina ma amata aloaia ai nei le galuega. Ua ono ai nei i le ekalesia fou lenei ekalesia a le Voice of Christ i le Setete o Vitoria ma le aai o Melepone.
O le susuga i le taitai aoao o Niu Sila ma Ausetalia le susuga i le faafeagaiga ia Ps Uilisone Taito mai Aukilani na fofogaina le manatu apoapoai mai le Tusi Paia ma faapaiaina le Ekalesia fou.
O le susuga ia Lepisi Lilomaiava mai Aukilani foi na taitaia le sauniga faatasi ma le soosootauau a le toeaina o Melepone le susuga ia Aliiaunoa Fagaloa, a’o faavailolo le mamalu o faafeagaiga o isi falesa atoa ma le mamalu o ekalesia uma na ositaulaga faatasi ma siitia le viiga o le silisiliese.
Na mae’a le taulaga o viiga ma le taulaga o le faapaiaina, ona sosoo lea ma le taumafataga tele na maau i ai le ekalesia fou, o sa latou taulaga foi lea e faafetaia ai le mamalu sa auai mo le afifio atu ma lagolagoina lo latou faatalaauula mai.
O le maota o taumafa mo faamoemoe tetele faapenei na tali ai le sua, o faaaloaloga mo le aufaigaluega paia a le Atua na faaiu i ai faigamea i le Aso Sa na tuanai atu, ma taape ai ma le mama ua lomi. Manuia le Ekalesia fou, ia tele ni agaga e manumaloina mo le Atua.
