Faapaia tofi Puleaga Katoliko Samoa i Melepone

E faavae le Malo tutoatasi o Samoa i Sisifo i le Atua. E ui la ina eseese talitonuga ma le faatinoina o tapuaiga faakerisiano a Ekalesia eseese, ae tasi lava le faavae o Samoa uma, o le Atua soifua lea.

E pei ona masani ai le tele o Ekalesia, e amata galuega fai o tausaga taitasi i le faapaiaina o tofi fou poo laulau fou ua autasi le ekalesia ma tofia e lagolagosua i galuega faatino mo lea tausaga.

O le Aso Sa la na tuanai atu, na faapaiaina ai le laulau fou a le puleaga Katoliko Samoa i le aai o Melepone. O le afioga ia Patele Paletasala Leota na taitaia le sauniga faapitoa o le Misasa ma faapaiaina ai tofiga fou ua ofoina o latou soifua e tautua mo le Ekalesia i lenei tausaga 2013.

O tofi na faapaiaina e aofia ai le taitaifono ua tauaveina e le afioga ia Lemalu Tevaseu Faasavalu Satupa‘i, o le sui taitaifono ua tauaveina e le fetalaiga ia Tunaimati‘a Niumaana Leone Siamo‘a, o ia foi o le fofoga o le Ekalesia, o le aao tusitusi ua galue ai le tausi ia To‘alua Fai‘i, o le teuoloa ua tofia le faletua ia Venus Tofilau Iuta na te faafoeina mo lenei tausaga, a o le taitaipese o le a tautua ai le tofa ia Maluitumua Silivelio Tuiatua, a o le faatamā ma le taitai aoao o le Ekalesia o le afioga ia Patele Paletasala Leota.

O le Puleaga Samoa e 5 ona Palisi, lea na saunia ma fofogaina viiga o le sauniga. O le faitauina o le feagaiga tuai na fofogaina e le afioga i le taitaifono ia Lemalu Tevaseu, a o le feagaiga fou na fofogaina e le sui taitaifono le fetalaiga ia Tunaimati‘a, ae pei ona masani ai le Ekalesia, o le afioga lava ia Patele na fofogaina le Evagelia.

Na mae‘a le sauniga ma le faapaiaina o le laulau fou, ona alo lea i le taumafataga tele ma le felanulanuai na saunia lava e palisi eseese o le Ekalesia, na mamalu ma matagofie naua le faamoemoe, ona o le afifio atu o le paia ma le mamalu lasilasi o Samoa, faapea uo ma aiga, aemaise foi o la latou faamanuiaga mo le laulau ma tiute tauave o le a feagai ai.

Ia utupupuina e le Atua finagalo ma faauuina soifua o le laulau, auā le Ekalesia ma lona lumanai. Na maualuga le viiga o le Atua ina ua ta‘ape le fuamanusina ma le mama ua lomi ma le agaga o le faamanū. Manuia faiva ma tiute o le a feagai ai.