O le valaauina o le soifua mo le galuega a le Atua, o se faamanuiaga ma se isi laasaga fou lea i le soifua auauna o alo ma tamafanau a le atunuu aemaise soo se tasi.
O le ekalesia Uesiliana Metotisi Logan City, na amata tausia ma vaaia mai e le susuga i le faafeagaiga ia Rev Falemai ma le faletua ia Kelly Mika i le 2008 seia oo ina faaee pāpā o le tala lelei, faapaleina ma Sea o le galuega a le Atua i le ekalesia.
O le tausaga ua mavae na atoa i ai tausaga e alagātatau ona o la soifua e avea ma faafeagaiga malolo manumalo, peitai na toe faaauau la laua tautua seia aulia mai le tausaga lenei a o faapea ona tapena mai le susuga ia Rev Michael Mika ma le faletua ia Elizabeth Mika e silasila ma vaavaai pea i le faagasologa o le galuega.
O le Aso Sa ua tuanai na malaga mai ai le Peresetene aoao o le ekalesia Uesiliana Metotisi, Susuga ia Rev Samuelu Vaeagi (Niu Sila ma Ausetalia) e taitaia le sauniga ma faapaia le tofi o le susuga i le faafeagaiga ia Rev Michael ma le faletua ia Elizabeth Mika. (Eva, Salelesi & Afega).
Ua faamoemoe o le masina o Oketopa o le tausaga nei o le a faauu ai o la tofi i Niu Sila ae o le taimi nei ua mae‘a ona faapaia e avea ma faafeagaiga o le ekalesia.
O le failautusi a le ekalesia aoao sa fai ma fofoga o le aso, susuga ia Rev Tavita Filemoni mai Ueligitone.
O le tofa ia Tuā‘autoto‘a Auimatagi Timoteo sa fai ma sui o aiga auā faaaloaloga i le paia i le aufaigaluega a le Atua.
Na tali fuaitau le tofa ia Poulava Sam Matautia o le sui o le ekalesia e faafetai le paia i aiga i le maualuluga o faaaloaloga e pei ona vaaia ai le masii atu o tauaiga e auai ma faailoa le valevale alofa i le faamoemoe o le susuga i le faafeagaiga ia Rev Michael Mika ma le faletua ia Elizabeth Mika.
Na ta‘ape le filialii ma le alaga fiafia, faafoi pea le viiga i le Atua ua tau lau o le faamoemoe.
