Na matuā faatumulia le nofoaga poo le hall a le ekalesia Katoliko i Malaeola, ona o le sauniga faapitoa sa faapaiaina ai ma momoli ai i luma o le Atua, le aufaigaluega galulue ma tofiga uma mo lenei tausaga 2011.
E masani ai i tausaga taitasi, a mae‘a ona tofia ma filifilia le laulau ma ona tofiga, faatasi ai ma isi vaega uma i matata eseese i totonu lava o le ekalesia, ona faaee lea ma momoli i luma o le Atua i le sauniga faapitoa.
O le sauniga o le Aso Sa na tuanai atu nei, aso 6 o Ianuari na amata lava i le faatinoina o le ifoga faa-Samoa. O se vaaiga matagofie tele, faaaloalogia, ma le mamalu ona o le agaga sa faatinoina ai le Ifoga Faa-Samoa i totonu o le sauniga.
O se tulaga e seāseā lava foi ona vaaia ma faatinoina i sauniga lotu, peitai e ese foi lagona ma le vaai i le faataunuuina o lea foi tu ma le aganuu a Samoa i taimi faapea, aemaise ai o loo faitaulaga ai agai i le Silisili Ese.
O le faaaogāina foi o le tu ma le aganuu a le atunuu, ua lē ese ma le agaga sa faatinoina ai i le sauniga a le ekalesia, ona o le manatu ma le tāua tele o le va o le tagata ma le Atua.
E pei ona silafia le mafuaaga e faia ai se ifoga i le faa-Samoa, ona ua matuia se agasala ma ua manaomia ai se faamagaloga. O le ifoga i tu ma aga a Samoa, o le faailoga lea o le salamō moni, ma le taliaina o le sese ma se aga ua sala.
O se tu e matuā maualalo tele i le vaai faaletagata, peitai e matuā maualuga i le silafaga a le Atua, ona talu ai o le ata moni o le lotomaualalo, ma le faamaualalo.
O le ala foi lea na mafua ai ona faatino ma faia lea tulaga e amata ai le sauniga, ona e manaomia le faamagaloga ma le faamamāina mai le Atua.
O tofiga atoa ai ma i latou ua toe filifilia mo le tauaveina o galuega o lenei tausaga, e manaomia le talia ma le faapaia mai o Lē e ona mea uma, o le Atua lava lea.
Sa faamaonia mai e le susuga i le laau na fausia, le afioga ia Tanuvasa Tavale, o ia foi lea o le peresitene aoao o le ekalesia i Niu Sila.
O tofiga e pei o le Peresitene ma lona sui, o le Failautusi ma le Teutupe, atoa ai ma le tele o isi tofiga, e pei o ta‘ita‘i Autalavou, Aoga Aso Sa, e oo lava ia i latou e feagai ma le faia o Kominio sa aofia uma i le faapaiaga sa faia i le sauniga i le faaiuga o le vaiaso.
E 25 le aofai o aulotu poo ekalesia Katoliko sa auai faatasi uma i le sauniga sa faataunuuina.
O le feiloaiga a le Samoa Times ma le afioga i le Peresitene Tanuvasa Tavale, e lē gata ina sa fesoasoani mai ai i le uiga ma le autū o lea foi sauniga tāua, peitai sa avea foi o se avanoa e faaaogāina, e momoli ai lana faafetai ma lana faamanuia i le mamalu lautele o le ekalesia aoao ma ona ta‘ita‘i.
O le agaga faafetai o Tanuvasa, ona o le pule ma le faaaloalo aemaise o le faatuatuaina o lona tagata, atoa ma sui o lana laulau, ua toe filifilia ma toe tulai ai mo le faaauauaina o galuega mo lenei foi tausaga.
O le afioga ia Tanuvasa Tavale ua sefulu ai lea o tausaga sosoo o loo tulai ma tauaveina le tofiga o le Peresitene aoao o le ekalesia i Niu Sila.
Na faailoa foi lona fiafia tele ma le faafetai i le Atua, ona o le malosi o loo mafai ona auauna ai ma tautua e ala i lea foi tofiga, ma e lē mavae lona naunau e galue pea a o maua le soifua ma le ola.
Ua toe filifilia foi le afioga ia Maiava Setefano i le tofiga Sui Peresitene, e faapena foi le Failautusi ua toe tulai mai ai Fololina Acosta, ma le Teutupe ua toe filifilia foi i ai Tamara Vitale.
O i latou ia sa galulue ma tauavea ia tofiga i tausaga ua tuanai, peitai ua toe ave i ai le faatuatuaga o le ekalesia aoao mo le 2011.
O le mae‘a ai ona faatino o le Ifoga ma le faapaiaina o tofiga o le ekalesia aoao, ona sosoo ai loa lea ma le sauniga masani e pei ona faatulagaina.
O le tuua ma le mae‘a o le sauniga faapitoa o lea foi aso, ona alo ai lea o afioga i Patele ma le mamalu i Fesoasoani ma tulaga tofi, faapea le mamalu o valaaulia ma aiga taitasi i le toonai tele sa tapenaina, ma taape ai loa i le fiafia ma le viiga o le Atua.
