O le sauniga sa faapaiaina ai i le sakalameta o le faaipoipoga le susuga ia Papu Su‘ega ma lana manamea ia Matagi Su‘ega, sa taitaia lea e le taitai matagaluega o le Ekalesia Aso Fitu Samoa Tutotasi, le susua ia Pr Lagolago Levae. O lenei sauniga mamalu sa faia i le aoauli o le Aso Sa, aso 21 Iulai, i le malumalu lava o le matagaluega i Bellbird Park.
O le alii faaipoipo o Papu o ona mātua o Sale ma Seulata Su‘ega. O le tamaitai faaipoipo ia Matagi Levae Su‘ega o ona mātua o le susuga ia Pr Lagolago mai Matautu Falelatai ma le faletua ia Puataunofo mai Saoluafata ma Amerika Samoa.
E lei atoa se ‘afa itula na kiu ai le auvalaaulia i taumafataga ae toe nofoaia ona o le lelei tapena o le faamoemoe a le tama matu o Poulava faapea le tausi ia Lorna o le Uncle Sam’s Take Away, sa feagai ma le fofoga taumafa.
E toatele faafeagaiga ma aiga sa faatasi mai e molimauina lea aso faapitoa e le gata o Sini Melepone ae faapea foi ma Niu Sila.
O le Fofoga o le aso o le susuga i le toeaina ia Setiu Iakopo Togipau, a o le susuga i le toeaina ia Faleauto Tufi Lauama Siligi sa tu tootoo e fai ma sui o aiga na lua, ae o le fofoga o le susuga ia Sauoaiga Toli Taafua sa molimolia se faafetai i aiga na lua.
