E ui lava ina ua motu mai ma le taula, ae o le valaauina mo le galuega a le Atua e tala‘i lona finagalo, o lana lea pule ma tofiga e tuusa‘o mai le lagi, ma e tuusaoloto foi i soo se taimi ma soo se atunuu, o fea lava e afifio ma saili malo ai lo tatou atunuu, ae a valaau lava le Atua, e ao lava ona usitai ma tulai e tali le valaauina.
O le Aso Toonai na mavae atu, na faapaia ai le valaauina o le susuga ia Amosa Eteuati Leuu ma le faletua ia Lealoa Leuu, ma la laua Ekalesia fou e pei ona faatūina i le pitonuu o Mill Park i le aai o Melepone.
O le susuga i le faafeagaiga ia Enele Tailiki le teuoloa a le Ekalesia aoao i Ausetalia na taitaia le sauniga, o le afioga a le Atua na tomatauina ai le Ekalesia fou ma le valaaulia, na feagai ma le aaotusitusi o le Ekalesia i Ausetalia le susuga ia Komisi Lealamisa, a o le faapaiaina ma le faauuina o le susuga i le faafeagaia ma le faletua faapea le Ekalesia fou, na feagai lava ma le susuga i le taitai aoao o le Ekalesia i Ausetalia, le susuga ia Onesemo Pulepule.
Na auai foi le sui taitai o Ausetalia le susuga ia Kiki Taulapapa, faapea foi le sui taitai o le itu Samoa o le AOG i Ausetalia le susuga ia Apouani Unasa, o nisi foi o faafeagaiaga sa auai o le susuga ia Chiko Sheck, Poasa Gosche, Toso Fale, Alofi Tuigamala, Tito Fepuleai faapea foi le susuga ia Dr Peniamina Willams.
Na mae‘a le sauniga paia, ona feagai lea ma le taumafataga matagofie i se tasi o faleaiga tele i le pitonuu o Roxburg Park, ma faamae’a ai le aso tele o le Calvary Samoa AOG i Mill Park ia latou faaaloaloga mo le aufaigaluega paia e pei ona masani ai le atunuu.
O le tofa ia Poualae Samuelu na tu tootoo mo le Ekalesia fou mo a latou faaaloaloga, ona tali fuaitau lea o le susuga i le faafeagaiga ia Tito Fepuleai e fai ma sui o le komiti ma le Ekalesia aoao. Na ta‘ape fiafia le mamalu o Samoa ma le mama ua lomi i faaaloaloga a le susuga ia Amosa ma le Ekalesia a le Kalevaria, ma la latou faamanuiaga “Ia tupu ma ola le galuega, ma ia tele ni agaga e manumaloina mo le Atua ma lona finagalo” Calvary Samoan AOG, o outou māmā na!
