Faapaia le Maota o Tupulaga mo a Taeao i Aranui

Faia mea sili ae faatali mo mea silisili, o le galulue faatasi ma le faamoemoe e tasi o le sini lea ia taulai i ai le silasila ma le faamoemoe ia manuia tupulaga lalovaoa o le atunuu.
Na matua faatumulia le laueleele laugatasi o Aranui i totonu o le ekalesia Saili Malo i le Atua, PIC Samoa i le Aso Toonai na mavae atu nei i le valaaulia ma le maave eseese o le atunuu, o e na molimauina le sauniga o le faapaiaina ma le tatala aloaia o le Maota o Tupulaga, lea o loo taitaia e le susuga i le toeaina Rev Fitifiti Luatua. O le susuga i le toeaina Rev A.T. Lemuelu (PIC Otara), sa taitaia le sauniga i fafo lava o le faapaologa o le maota, ma o le toeaina foi sa fofogaina le upu faalaeiau o le aso, ae o le tatalo sa taitaia e Rev Lapana Faletolu (PIPC Kalaiesetete).
I se saunoaga a le susuga i le faifeau Rev Fitifiti Luatua, mo le faamatalaina o le tala o le galuega lea na amata mai i le 2007, sa muai tagi lava i lima e ala i atinega a le aulotu aemaise o le fesoasoani tupe faameaalofa na ofoina mai e le Malo (grants).
O le tofa mamao ma le anavatau mo le faia o lenei maota, ia ola manuia, saogalemu ma ia malupuipuia tupulaga mo a taeao, ae mo le faagaioiina o le tofa mamao e ao ina faaaogaina fesoasoani uma e maua e lo tatou siomaga aua lava tupulaga.
Na taua foi e le toeaina, o le faamamafa autu o le ola faa-Kerisiano o tupulaga ma ia malamalama o le aganuu faa-Samoa ma le talitonuga faa-Kerisiano e galulue fesootai ma uulima faatasi.
E maeu foi le loloto o le lauga faalaeiau a le toeaina Rev A Lemuelu, na ia saunoa ai, afai ua e faia se atinaega lelei, aua nei gata ai iina a ia galue pea mo le lumanai.
O le saunoaga mo le tatalaina o le maota atoa ia ma le tuuina atu o le ki i le faifeau ma le aulotu sa fofogaina e le toeaina Rev Elama Maea (PIC Petone) ae o le lipine na ootiina e lona faletua, le tamaitai loia o Emily Maea.
E toatele le mamalu o le auvalaaulia i le aufaigaluega sa auai aemaise e malaga mamao mai Aukilani, Ueligitone seia paia lava Dunedin ma Invercargill.
Ina ua maea ai le faaulufaleina o le mamalu tele i le valaaulia i totonu o le maota fou o tupulaga, sa tatalo le susuga i le toeaina EFKS Woolston, Rev Tumama Vili mo le faapaiaina o le maota.
O se aso matagofie e le gata i le lagilelei ae ua lau i ula tepa i ula, ua a‘e le faatautaiga ua tau lau o le faamoemoe, ma sa faatasi uma atu le valaaulia i le War Memorial hall mo le faagasologa o le polokalame.
E maeu foi le lima foai na vaaia i lea aso, o le aao mafola o le atunuu, aemaise faifeau ma ekalesia na auai mo le agaga soosoo tauau atu i si ekalesia ma le faamoemoe, ma maua ai se tupe ma se faitauga faatopetope o le seleni e $41,200.
Na alo atu i le taumafataga tele na saunia ona sosoo lea ma faaaloaloga maualuluga na tauaaoina e Rev Fitifiti Luatua ma le ekalesia PIC Aranui aua le mamalu o le valaaulia e masani ai itu aso faapenei.