O le tausaga e 1945 na muai faavae ai le aulotu a le Ekalesia Faapotopotoga Kerisiano Samoa i Vini Fou, o se afioaga i le ogatotonu o Faatoia ma Moataa. E le o se nuu tele ae ua umi lana tapuaiga lotu. O le faaiuga la o le vaiaso na tatala aloaia ai loa e ala i le sauniga o le umusaga poo le faaulufalega, le malumalu ua mae‘a ona fausia e lenei aulotu.
O le malumalu lenei ua valu masina talu ona fausia ma o le tele lava o le seleni na fausia ai na aoina ma faaputu lava e sui o le aulotu. Sa iai se fesoasoani faaopoopo a sui o lenei ekalesia i Vini Fou o loo nonofo i Niu Sila, Ausetalia ma isi vaega o le lalolagi ma na faafetaia uma lo latou sao i le atina‘e a le Atua i le afioaga i le Aso Faraile na tea nei i se sauniga e tatala aloaia ai lenei malumalu.
O le aulotu e to‘a 13 ona matafale ma o le tau atoa o le galuega e sili laitiiti atu i le $300,000 tala Samoa. O le afioga i le alii faipule, o ia foi o le tamā matua o lenei ekalesia, le Afioga Aeau Peniamina Leavai, sa saunoa i le tala o le galuega ma le taumafaiga a matafale uma ina ia unai vave le galuega, ma o le agaga faafetai lea ona o le lima foai o fanau a le nuu, le ekalesia i lenei taumafaiga.
Talu ai na malaga i fafo le afioga mamalu i le Ao o le Malo, le Afioga Tui Atua Tupua Tamasese Efi, o lea na sui tulaga ai le afioga mamalu i le Sui o le Fono a Sui Tofia, le Afioga Tuimalealiifano Vaaleto‘a Sualauvi II e fai ma sui o le atunuu atoa i lenei sauniga.
E le gata i lea na auai atu ai foi sui o le Malo ma sui o le Palemene o Samoa, o sui o le Pulega a Apia i Sisifo, le faauluuluga o le Ekalesia Faapotopotoga Kerisiano Samoa e pei ona iai le afioga i le Taitaifono le susuga i le faifeau toeaina faatonu, Rev. Elder Tautiaga Senara, lea na saunoa i le lototele o le aulotu laitiiti ma le malosi o lo latou silasila i le faaleleia o le nofoaga o tapuaiga i le Atua.
O le Tusi Paia atoa ai se tinoitupe e $20,000 (tala Samoa) na foai atu e le EFKS i le faafeagaiga Rev. Fuifui Teevale ma lona faletua ma le aulotu a Vini Fou auā le ausia ai o lenei tulaga maoa‘e i le soifua tapuai o tagata o lea itu o le Vaimauga.
