E silisili lava Ieova! Ua faapaia le Malu tapuai, Ekalesia EFKS “Le Lamepa Logan West” o loo tausi ekalesia ai le sisuga Rev Perelini & Tiliilagi Tauilo. O le faamoemoe ua taunuu o le laau o le soifua lea. O le viiga ma le faamanu ma le faafetai i le Atua ona o Lana tali faaaliali e tusa ma le nofo tatalo o le ekalesia.
O le Aso 23 o Oketopa i le 2015 na faataunuuina ai le faamoemoe o le faaulufaleina lea o le Malu tapuai o le Atua ale Ekalesia ‘EFKS Le Lamepa Logan West’.
O le tau o le galuega e $160,000.00 sa faatau mai ai le fale mai New South Wales, o le fale sa fau faapitoa mo le army peitai o lea ua faaaogāina tatau ma toe fausia auā le tauina o le taua faaleagaga e laveai ai agaga mo le Atua ma Lona finagalo. O se miti ua taunuu e pei ona faatalatalanoa mai le tausaga e 2009 e le ekalesia ina ua atoa ai le sefulu tausaga talu na faavae mai le lotu i lena taimi. Na ona tuu atu i talosaga ma vaavaai pea peitai sa lei mautu ni manatu seia oo ina tali le Atua i le taimi ua talafeagai ma ua alagatatau loa ona faataunuu ma faatino ai se galuega o se malu tapuai.
Na amata faatino loa le galuega i le masina o Fepuari i le tausaga e 2014. E ese mai i le $160,000.00 na faatau mai ai le fale, na toe faaalu le isi $120,000.00 e toe faalelei ai le tele o vaega o le fale ia foliga o se faletapuai. Sa toe sui uma le ata ma liliu ai ma tino mai le galuega tele.
O le aitalafu atoa o le galuega e $480,000.00 sa nono mai i le faletupe e faamotu ai le mokesi muamua e $200,000.00. O nofoa o le falesa na maua i luga o upega tafailagi sa faameaalofa fua mai e ni Samaria ina ua mautala o le manaomia mo le lotu.
E maeu le agalelei o le Atua i le alofa tulai e pei ona ofoina ai le taimi o le tufuga ia Auapaau Stewart Wong o ia o le kamuta sa fesoasoani malosi e faamae‘a le galuega faapea ai ma le fesoasoani a Lemalu Perelini, Sauvao ma nisi e toatele sa faavae mai lo latou soifua faaleagaga i le Ekalesia a Le Lamepa.
E lē gata i le ofoina o taimi o tagata ae sa galulue lava le ekalesia ma tuua atu a latou galuega ona o le galuega i le fia faamae‘aina.
O le molimau a le faifeau ma le faletua atonu o se auala lea mai le Atua ia faataunuu loa e ala i le faatuatua ma na vaai ai lava vavega a le Atua ma Lona Aao taitai. E tasi le tausaga ma masina sa faia ai le galuega ae faapaia loa i le aso 23 o Oketopa 2015.
O le lupe faalele mai Matautu & Gagaifo Lefaga ma Lalomanu Aleipata le susuga ia Rev Perelini ma le faletua ia Tiliilagi Tauilo (Afega, Malie & Falevai Falelatai) o loo tausia le Ekalesia Le Lamepa Logan West.
O lea foi auauna ma le faletua e molimauina le tele o a laua galuega fesoasoani ma le lagolago i nisi o vaega fai a nisi o faalapotopotoga ma Asosi i totonu o Kuiniselani.
O Auaapau Stewart Wong sa foaia le ki o le galuega i le taitai o le sauniga ia Rev Ionatana Faaiuaso.
O le sauniga o le faapaiaina o le malumalu sa taitaia e le Toeaina taitai o le Pulega a Logan le susuga ia Rev Ionatana Faaiuaso, ae o le Komiti Faatonu poo le Toeaina Faatonu ia Rev Tauaaga Mataafa (Matagaluega Saute) sa fai ma sui o le ekalesia aoao e faaoo le meaalofa $10,000.00 mo le galuega a le Ekalesia EFKS Le Lamepa Logan West.
O le faletua penisiona malolo ia Tima Tu‘iai sa ootiina le lipine, le faletua o le toeaina penisione malolo ia Rev Samuelu Tu‘iai.
Na alalaga fiafia le ekalesia ma talisapaia le seleni paia e $109,000.00 o le aao foai i faigataulaga a le aulotu, meaalofa a le auvalaaulia, meaalofa a le aufaigaluega o le matagaluega faatasi ai ma tauaiga, uo ma paaga ma isi ekalesia.
Sa auai mai le faifeau toeaina Rev Fiatepa ma le faletua o Penina Faaee atoa ai ma nisi o le aufaigaluega Penisione sa auai na mamalu ai ma maualuga le faamoemoe.
O le failautusi a le ekalesia sa fai ma fofoga o le aso ma tu tootoo auā le faamoemoe le susuga i le aoao ia Lalau Paitomaleifi. O le tofa ia Tupai Joe ma Maria Lealaitafea o le faleaiga a le Apia lua sa feagai ma le tapenaina o le taumafataga lea sa faia faataunuuina ma faia ai faaaloaloga i le Tiafau Hall a le ekalesia EFKS Soutwest Brisbane.
E avea faapitoa le nusipepa a le Samoa Times e tuuina atu ai mai le taele o agaga o le susuga i le faafeagaiga ia Rev Perelini ma le faletua ia Tiliilagi ma le aulotu se agaga faafetai tele:
I le mamalu o le laulau a le fonotele ekalesia aoao EFKS faafetai tele atu mo le mealofa sa tauaaoina mo le galuega, faafetai lo outou agalelei. E lē gata i lea o le mamalu o le auvalaaulia i le nofo a toeaiina ma faletua, paia o le aiga faifeau ma faletua faapea ekalesia eseese, uo ma aumea mamae, uso o le Tala lelei ma le paia i tau aiga faafetai faafetai tele.
E lē gata i faigataulaga, seleni a o tatalo ma le faamafanfanaga ua lagona ai e le aulotu to‘a gaogao le malolosi. O la outou soosootauau mai ua maua ai foi le lototetele e faia le auaunaga i le Atua.
Faafetai! Faafetai! Faafetai tele! Ia saga faamanuia le Atua ma toe sasaa faaua atu manuia mo mea uma ua faagaogaoina.
Rev Perelini & faletua ia Tiliilagi Tauilo, faapea le nofoaalo ma le mamalu i le Ekalesia EFKS Le Lamepa Logan West.
