O le Laumua Hall a le EFKS Rooty Hill lea e galulue ai le susuga ia Rev Kilifi Vaifale ma le faletua ia Sherry Vaifale, na faataunuuina lona umusaga i le Aso Toonai aso 15 Aukuso 2015.
O se aso matagofie na amatalia i le taalolo a paia o aiga na lua o le susuga i le Faafeagaiga ma le faletua. Na uluai faafeiloai e le susuga i le faifeau le aofia na aofaga potopoto atu ma faia se tatalo amata ma ootiina le lipine e le faletua o le Sui Taitaifono EFKS aoao ia Olita Senara ma faailoa le maa faamanatu i fafo.
Sa faapea ona tatala aloaia ai loa ma faitotoa o le Hall e le susuga i le sui taitaifono a le EFKS aoao. Na amata ulufale atu le valaaulia ma faatautaia i totonu o le Laumua Hall le sauniga.
Na taitai le sauniga e le susuga Rev. Elder Simeona Taefu ma sa faitauina le Tusi Paia e le faifeau ia Rev. Nuuausala Cowley ae o le lauga na saunoa ai Rev. Elder Tautiaga Senara (Sui Taitaifono EFKS).
Na momoli foi le faamalo ma le faafetai auā le agaga finafinau o le ekalesia mo mea sili. E $10,000 se meaalofa na malaga mai ma le susuga i le sui taitaifono. Sa tauaao atu ai foi e le susuga i le matua o faiva poo le kamuta le afioga Tupai Mau Moananu le ki o le galuega i le susuga ia Rev Kilifi Vaifale ma le Ekalesia.
Na saunoa foi le faafeagaiga ia Rev Kilifi Vaifale o lenei galuega na nonō mai se tinoitupe e silia ma le $800,000 ae uma le galuega na o le tusa ma le silia i le $657,000 na faatino ai ma le manuia. O le po o le Aso Faraile ae sosoo ma le umusaga, na vaaia ai foi le maau ma le milomilosia o aiga ma uo aemaise le maave eseese i se posiva a le aulotu na faia i le Hall a Tofuola ma ausia ai le tusa ma le $220,000 tala. E lei muta ai iina le lima foai ma le agaga lagolago o aulotu, aiga ma ē masani i le taimi o le aiga sa taualuga i ai le faapaiaina o le Laumua Hall.
Sa faailoa foi e le Faafeagaiga, o le uluai EFKS Samoa lenei na faatuina i Ausetalia i Balmain i le 1980 a o soifua le susuga Rev Tepa Faletoese ma le faletua ia May Faletoese, sosoo mai ai ma mātua o Rev Kilifi Vaifale ia Rev Luteru Vaifale ma le faletua ia Tereise.
O le vaitau o le 1990 na siitia mai loa i Liverpool le aulotu, sosoo mai ai ma le faatauina o le fanua i Rooty Hill lea ua iai le malumalu o le Peteleema Fou ma le Hall o le Laumua, le uluai lau o le laau o le sinapi na faavae ai le galuega i Ausetalia nei.
O le St Stephens Hall lea e tuaoi lava sa faia ai le taumafataga ma faaaloaloga lea sa toe maua ai se isi tupe tele ma faaopoopo i le Aso Faraile.
Na ta‘ape foi le fuamanusina ma si ana i‘a i faaaloaloga faatupu a le EFKS Rooty Hill e talimasinei ai le agalelei o le aofia ma paia na potopoto.
