Faapaia le galuega EFKS Saanapu tai

E matautia matatia ua faatu e le aulotu a le Ekalesia Faapotopotoga Kerisiano Samoa i le afioaga o Saanapu tai ina ua fausia lona malumalu tapuai. O se malumalu ua tele tausaga o faaleagaina i faalavelave faalenatura na afatia ai Saanapu ae o lea ua mae‘a ona toe fausia atoa. O le faaiuga o le vaiaso na tea nei na faaulufale ai le malumalu tapuai o lea pitonuu o Saanapu.

O viiga o le Atua e faafoi ai le faafetai ona ua taunuu le faamoemoe sa galulue ai lenei Ekalesia.  O le mauga lenei o le Atua sa gapatia ai le mamalu o le Ekalesia i Saanapu tai nei lea na molimauina e uo, ana tamafanau, le ekalesia ae faapea foi ana matafale lotu lona umusaga. O se galuega sa lē faigofie lona tau amataina peitai e leai lava se mea e maua ma se filemu.

Faaalia e le susuga i le faafeagaiga ia Rev Iakina Alefaio, o le sailiga tupe muamua lava o lenei galuega o se lulu ma na maua ai se tinoitupe e $150,000 (tala Samoa). Na agai le aulotu i Ausetalia ma faatu ai se matatia o se sailigatupe aupito tele lea i sailigatupe a aulotu mo se fesoasoani ma na maua ai se tinoitupe e $187,000 (tala Ausetalia) tusa lea ma le $370,000 (tala Samoa).

Na faatino le galuega e le konekarate faufale mai i Saina o le Zheng Construction ma o le isi lea matatia e na o le lima lava masina na faatino ai lenei galuega tele. Na foai e le EFKS e ala i lona sui taitaifono ia Rev. Elder. Tautiaga Senara le tinoitupe e $20,000 tala e faimeaalofa ai i le mae‘a ai o lea galuega ma le soifua tauivi o le aulotu.

E fai le faaulufalega ae faaali ane e toe $130,000 le aitalafu o loo totoe o le galuega lea ae mae‘a le aao mafola o aiga ma uo a le aulotu ae maua ai le tinoitupe e $380,000 (tala Samoa), o lona uiga ua mamā le aitalafu totoe ai ma le tupe mo isi atinae a le aulotu.

O le tau atoa o le malumalu e $691,000 (tala Samoa). O lea galuega ua faaigoaina o le Ana o le Faaolataga ma e 45 aiga poo matafale o lenei aulotu.