Na aofia potopoto le faleono o le Ekalesia Aso Fitu Tutoatasi Samoa o le Matagaluega i le aai o Perth, faatasi ai ma le taitai aoao o le ekalesia atoa i le lalolagi, le susuga i le faafeagaiga taulagi ia Pr Uili Papu i le Aso Sa aso 2 o le masina lenei, auā le faapaiaina o lo latou fanua e tusa ma le 52 eka le tele, lea ua amata fausiaina ai le malumalu o le matagaluega faatasi ma le fale o le galuega.
O le susuga i le taitai aoao na taitaia le sauniga, faatasi ma le lagolago a le taitai o le matagaluega a Perth le susuga ia Pr Ata Tanuvasa. Na mae‘a le sauniga sosoo ai ma le suaina e le taitai aoao o le uluai suo palapala mo le amataina o le galuega tele, ma faaiu ai i le taumafataga tele. E ui ina tele le galuega ua amataina, ae ua tautino le konekarate o loo nafa ma le galuega, e tatau ona oo atu i le masina o Me o le tausaga fou ua mae‘a ma umusa ai.
Na faailoa mai e le susuga i le tiakono toeaina o le matagaluega a Melepone, o se sui foi lea o la tatou pepa i Melepone, o le tau atoa o le fanua faatasi ai ma le malumalu ma le fale o le galuega i lona faatinoina e tusa lona tau ma le fā ma le ‘afa miliona tala.
Faaalia le mitamita o le matagaluega a Perth ona o le faamoemoe sa fau ao fau po ma tuu atu i le Atua i talosaga, ae o lea ua amata vaaia lona faatinoina, e viia ai le Atua silisiliese.
Tatalo ia faamalumalu Aao alofa o Ieova i le paia o le Aufaigaluega ma le nofo a Too o le matagaluega, ma puipui aulape i ona falelotu e ono, ina ia tau lau o le faamoemoe ma amata faaaogā ai le mauga o le Atua mo ona viiga.
