“Faafetai i le Atua i lona alofa fua, lona alofa ua tumau e lē liu e faavavau.” O upu nei a le tusipese Metotisi sa lagiina ma sufi ai lona alofa i le sauniga i le Aso Toonai na mavae na faapaia ai se fale ma se fanua, e le afioga i le alii Sea o le Sinoti (Superintendent of Synod) a Niu Sila i Matu, le susuga ia Masunu Utumapu, ina ua taunuu i lea aso se faamoemoe sa finau i ai le Aulotu a le Ekalesia Metotisi Samoa i Middlemore nei.
O le fale ma le fanua (809sqm) ua mafai ona faatauina ina ua laasia e lenei aulotu ona faamalieina tulaga (20% deposit). Sa faatonuina e mafai ai loa ona nonō mai se vaegatupe mai i nonoagatupe i le BNZ, e amata ai le galuega a lenei Aulotu fou.
E lē o toe faigofie ma e lē taugofie foi le amataina o se galuega fou i lenei vaitau. Ae o le fanau a le Atua e faamoemoe i le Atua e faasino mai lona finagalo e ala i lona Agaga Paia i ē o loo auauna ma finau i ana galuega.
E toagaogao si aulotu nei, ae e iai le faitau a Samoa e faapea, “ia to‘agaogao atoato tetele”, e iai le tofa ma le moe, e iai le fautua aemaise o loo taitai i lalo o le faamalu a le Atua, o lana Ekalesia Metotisi i Samoa lea.
O le Aulotu nei sa faatūina i totonu o le sinoti o Niu Sila i Matu i le aso 16 Mati 2008 e le alii faifeau misionare a le Ekalesia, le susuga ia Saomalie Samoa i le finagalo o le alii Sea i lena taimi le susuga ia Vaiao Eteuati.
O Iulai 2009, na momoli atu lenei Aulotu i le Koneferenisi i Samoa mo se latou faifeau, ma tofi mai le alii faifeau le susuga ia Popole Mapusua ma Marie Mapusua e tausia le Aulotu. Sa faamautu le alii faifeau ma lona faletua i le fale o mātua (Mr. Mapusua Pole ma Mrs. Faaopega Mapusua) i Magele mo se taimi puupuu, ae fai sauniga i Aso Sa i le Mangere Community House.
Ina ua tupu le Galuega a le Atua, na liuliu le tofa ma faautaga e saili loa i se tino i tupe auā se fale e fai ma meatotino a le Aulotu ma faamautu i ai le faifeau ma faatino ai sauniga i Aso Sa ma meafai a le Aulotu.
Ua fetaui lenei faamoemoe ma se tofa ma faale-Atua na a‘e i ai le afioga i le alii Sea Rev Masunu Utumapu i se polokalame mo le Sinoto (Lalago Faatasi), ia ave le faamuamua i galuega a aulotu fou o loo tau atiae. Ma e faapena ona talia ai se talosaga a lenei aulotu e ala i se Posiva na faatino i le masina o Fepuari 2013 i Faletoi Otara, ma maua ai se tino i tupe i le lagolago a le Sinoti, o aiga ma uo mamae, ma ipu a lenei aulotu e $45,428.91.
Ua mafai foi e lenei Aulotu ona faaputu se teugatupe tumau mo lea faamoemoe i lenei tausaga e $20,600.00, faatasi ma le meaalofa a le Ekalesia ua tuuina mai e $30,000.00 auā foi lea faamoemoe. O le aofai o se tupe ua amata ai lenei galuega e $96,028.91. O le uiga lea o le manatu a le alii faifeau, e lē faigofie ma e lē taugofie foi, o le agaga foi lea a le Matagaluega i Middlemore nei, ua tele nei tupe ua foai ma maua ma faamauina.
E tatau foi ona molimau lana auauna sa amata mea (Rev Masunu Utumapu) i le polokalama (Lalago Faatasi), aemaise o le Ekalesia Metotisi i Samoa ma atunuu mamao. Le Sinoti i Niu Sila i Matu, ua talisapaia e Middlemore ma faaaogā lea maau ma lou agalelei mo le galuega a le Atua e ala i lenei fale ma fanua (53 Buckland Rd, Mangere East).
E leai se manuia i le faifeau ma lenei Matagaluega, ae alofa mai le Atua ma sasaa mai lona tamaoaiga i luga o lana Ekalesia, ma le Sinoti i Niu Sila i Matu, o aiga ma uo mamae aemaise soo se tasi ua foai ma lagolago i le tau atiae o lenei galuega. Soifua maloina oulua mātua o le Ekalesia lau susuga Aisoli Iuli Tapa ma Fualole Iuli Tapa.
Ia maua le mau, le tofa faale-Atua auā fonotaga a le Ekalesia i lena masina. Faafetai mo tatalo ma le tapuaiga i le Failautusi o le Ekalesia lau susuga Apineru Lafai, le teutupe o le Ekalesia, lau susuga Ropeti Faleatua, le nofoa Sea i Sinoti e fia a le Ekalesia ma le Ekalesia aoao.
Ua matou lē manatu i se mea e fai e le Ekalesia mo lenei Aulotu (vaeane lau meaalofa), a o le agaga ia Middlemore Metotisi, ia fai so matou sao ia matou olo pitovaa mo le Ekalesia a le Atua. Faafetai tele i lau susuga Masunu Utumapu ma le faletua Senerita Utumapu i le tofa faale-Atua ma le silasila mamao, le failautusi o le Sinoti Oianatai Matale ma le teutupe tofa Faamatuaina Aigamaua Tauiliili.
E lē galo foi le tapuaiga i tamā ma tina malolo manumalo ma lau susuga Elia Suisala ma le faletua. Lau susuga Michael Collins (pule fale lomitusi) ma le faletua mo le lua sao a o tatou galulue.
Middlemore, e tāua upu a le alii Sea, o le uma o se faamoemoe o le amataga foi lea o le isi faamoemoe. Aua le muta le ola finau a o tatou iai pea i le amataga o le galuega a le Atua, e aoga le amata i le toalaiti, a ola ma toatele e iloa ai foi le toatele. Ia faia lau taulaga nei mo le Ekalesia a le Atua ina ua ta molimau, e leai lava se mea e faigata i le Atua.
O upu a le tusipese “Iesu ua ou folafola e faia au feau, e mulimuli pea i ou tulaga aao…”
