A‘o fetuleni mai le tele o mau ekalesia fou oloo faavae ma faatutū, atonu oloo ile lalolagi le soifua saoloto e faia ai filifiliga ole loto ole tagata, ma ose tulaga e lē ono faatapulaaina lea vaega aemaise lava i atunuu i fafo auā e lē pei o Samoa e iai pule mamalu a alii ma faipule e tapu ai i nisi alalafaga, ae o fafo e pule a le sitafune ile la o lona vaa pau lava le auga ia faavae ise ala moni male faamaoni ma ia sao ai le tapuai ile Atua ae sili ai ona maua le fiafia e tagata tapuai.
Ina ua mae‘a ona faapaia toeaiina ma faavae le ekalesia “Seventh Day, Day of The Lord” ile amata mai ile ono masina ua tuanai, na atofa ai le Aso Toonai aso 24 o Setema e faapaiaina aloaia ai le Ekalesia Aso Fitu, Aso ole Alii ma ua malaga le galuega ile taimi nei.
Ua vaaia le toatele o latou ua mafuta mai ma avea ma matafale faavae ale ekalesia e pei ona iai le fuainumera e 13 matafale ma nisi oloo tau faamautu. Ole sini autu ole faamoemoe ole susuga ile faafeagaiga, o nisi o i latou nei ua leva e lē o toe lolotu ae o ana galuega asiasi lea ua toe mafai ona mafuta ane ai ma latou tapuai faatasi, ma ose agaga fiafia lea e viia ai le Atua. Na amataina ise lesona, sosoo ai le lauga ona alo lea ile taumafataga ma ta‘ape ai le filialii ma na vaaia le toatele o i latou na mafuta atu e lē gata o sauniga ae faapea foi le faamoemoe ile aso faaiu.
Ole Aso Sa ua tuanai 25 o Setema, ose aso lea na talo ai le toatele ole auvalaaulia faapea aiga uma o matafale nei, ina ia auai faatasi ise fiafia mase faiga‘ai ose taumafataga e faafetaia ai le Atua ona ole pisi tele ile tau fofoaina mai male tau amata faatuina o lenei ekalesia ae o lenei ua tau lau ole faamoemoe. Ole taitai ole ekalesia poo le faafeagaiga ole susuga ia Pr Faamalologa male faletua ia Tamara Fuesaina male nofoaalo oloo tausia le aulotu.
E lē ose aulotu e faamalosia ini meafai pau lava le lauga tauave ale faifeau ia tautuana le sefulua‘i ale Atua male taulaga masani e pei ona ta‘ua mai le tusi o Malaki e 3.
Talu lava na amata mai le galuega e lē o iai se totogi ole faifeau e pei ona finagalo iai nisi ole aulotu ae ole saunoaga ale faifeau, “E tāua le agaga ole tagata ia fiafia i lana auaunaga, ole mea sili lea ona tāua e sauni fiafia ai mole lagi male ola e faavavau.”
