Na alausu aiga na lua i le tapisa ma alagaina le agalelei o le Silisiliese ona ua aulia ma le manuia le aso sa fau ao fau po ma tuu atu i talosaga, ina ia faatino ai moomooga o ni alo ma fanau e fia faapaiaina e avea ma tino e tasi.
O le aso na lagilelei le Aso Toonai na tuanai atu na aofaga potopoto ai le mamalu ma le paia lasilasi o Samoa, i le valaaulia uo ma aumea mamae aemaise le paia i aiga na lua e molimauina le Aso tele o le lalelei ia Quinney ma lana manamea ia Joe.
O le sauniga o le sakalameta na osia i le malumalu o le Ekalesia a Iesu Keriso o le Aupaia o Aso e Gata Ai i le pitonuu o Epping. O le susuga ia Epikopo Antonio Hellebuyck na taitaia le sauniga na osia ai le feagaiga ma faapaia ai le ulugalii fou, ae o le upu faauuina na tomatauina ai le mafutaga ma le folauga a le ulugalii, na fofogaina e le susuga ia Epikopo Esau Matautia.
Mae‘a le sauniga mamalu sosoo ai ma le taumafataga tele ma le felanulanuai na faatumulia ai le Ishtar Reception i le pitonuu o Coolaroo. O le fofoga o le faamoemoe na nafa ma le afioga i le tuua ia Masoe Tagaloatea Falemoa Pepe na talaaao mai le aai o Brisbane faatasi ma le faili malosi a le One Sound na feagai ma faafiafiaga tau musika.
Na see lelei le taliina o le sua i le matagofie o siva ma faafiafiaga a alo ma fanau a aiga na lua aemaise o uosili ma aumea mamae, na vasa‘i ma saasaaga faa-Samoa aemaise o siva topetope faapapalagi. O le tina matua ia Palepo na fofogaina le talaaga puupuu o le soifua o le faatoa faiava, ae o le tofa ia Pe‘i Tomasi Kennach ma le faletua ia Quinney Tusi na fofogaina le molimau mo si o la alo le faatoa nofotane, ma lufilufi ai ma le keke, ona saunoa lea o Tuuu Asomua e molimoli le agaga faafetai o aiga na lua i le Aufaigaluega Paia aemaise o tupu ma tamalii ma Samoa atoa ona o le faamoemoe ua maualuga, ae tasi le faafitiga a Samoa ia Taliaoa Pulemagafa e tali fuaitau e pei o faiva masani o le faleupolu o tofiga, ona ta‘ape ai lea o le filialii ma le mama ua lomi ma le viiga o le Tapaau sili.
Faamanuia atu le Atua i lo oulua aiga fou Joe Jr Moe ma Quinney Nessa Moe. Alofaaga mai o lua mātua peleina, uso, tuafāfine, tuagane, aiga uma aemaise la lua Ekalesia faapelepeleina.
