O le pitonuu o Footscray i le aai o Melepone o loo iai le isi lala fou o le Ekalesia VOC, lea na faapaia ma tatala aloaia i le Aso Sa na se‘i mavae atu nei.
O le susuga i le aaotusitusi o le matagaluega a Niu Sila ma Ausetalia, Pastor Lepisi na taitaia le sauniga, o le susuga i le toeaina Pastor Toloa Sio na nafa ma le laugaina o le afioga faauuina a le Atua ma fofogaina foi se finagalo faalaeiau mo le ekalesia fou.
O le taitai matagaluega a Niu Sila ma Ausetalia Pastor Uilisone Taito na nafa ma le faauuina o le faafeagaiga o Footscray, le susuga ia Pastor Suafa ma le faletua ia Terisa Vailoa na faapaiaina ai faatasi ma la laua ekalesia fou e pei ona sa o latou amataina mai le mafutaga i nai masina ua tuanai atu, lea ua avea nei ma ekalesia tausinuu mo agaga o le atunuu, aemaise le finagalo faauuina o le Atua silisiliese.
Na faapaiaina ai foi i le Aso Sa ma tofi eseese auā le lagolagosua i le galuega tau atiae, ua lagolagosua i le faafeagaiga le susuga ia Autagavaia ma le faletua ia Ana. O tofi A‘oa‘o ua iai le susuga ia Kaio ma le faletua ia Maggie, tofi Tiakono le susuga ia Danny ma le faletua ia Ato, taitai autalavou Patrick Sua ma le taitai faili o Ben Tuai.
O le aao tusitusi o le ekalesia ua galue ai Ato Tuai ma le teuoloa ua galue ai Maria Tuai. Na mae‘a le sauniga ona sosoo lea ma le taumafataga i le maota o taumafa, na feagai ai le ekalesia fou ma faaaloaloga masani ma ta‘ape ai ma le viiga maualuga o le Atua.
Ia manuia le galuega fou, faalua ane e Ieova lona Agaga ma lana faauuga mana i o tou laasaga uma, o outou māmā na, ia tupu ma uluola ma ia tele ni agaga e manumaloina mo le finagalo o le Atua.
