Faaopoopoina fanau Aoga ile Musika Piano

Alo ma fanau oloo a’oa’oina ile aoga Piano ale susuga ia Polima Salima

Ole tausaga ese lenei ile tulai mai ma le lolofi mai o fanau ile fia a’oa’oina ole taleni musika piano oloo faatinoina ele susuga ia Poulima Salima. Ua lima nei tausaga talu ona faavaeina mai lenei polokalame e lea alo ole atunuu, ona o lona naunautaiga ia faasafua atu lea maeaalofa ma le taleni ua tuuina ele Atua ia te ia mo alo ma fanau ole atunuu, auā le taina o viiga ole Atua i totonu o ekalesia.

Ole tausaga nei ua 34 tamaiti ua mafai ona taina musika i luga o lenei faaaliga piano, e aofia ai fanau e fiafia e pepese ma ta le piano faatasi ai ma fanau e na’o le musika. O fanau uma nei ua silia ile ta’i 2 tausaga agai i luga ile ta’i 5 tausaga talu ona auai i lenei aoga, ae lē o aofia ai fanau ia faatoa amata ona aooga ile tausaga lenei lea faatoa mafai ona oso i luga ole fua ile taina o musika ile tausaga fou.

Ole agaga fiafia ole susuga ile alii faiaoga ia Poulima Salima, o lona vaai atu lea ile naunau mai o mātua e unaia mai a latou fanau e faatāua le avanoa e faaaogā ai le ola ole fanau mo viiga ole Atua, auā e leai se mea nate mafaia pe aunoa ma le lagolago mai o mātua ma aiga.

Ole tausaga ese lenei mo ia talu ona faavaeina mai lana aoga, ona ua faaluaina le toatele o tamaiti lea ua auai, e pei ona molimauina e mātua ma aiga ile faaaliga piano i lenei tausaga lea ua 34 tamaiti ua mafai ona taina le laau, ae o le isi 30 tamaiti fou i lenei tausaga lea ua tapena atu e taina a latou lesona ile tausaga fou.  Ole afiafi ole Aso Sa ua mavae 10 o Tesema na faatumulia ai le malumalu ole ekalesia Metotisi i Mount Albert i mātua ma aiga e molimauina taumafaiga a latou alo ma fanau lea ua mafai ona auai i lea aoga.

Ose fiafiaga sili i mātua i lea afiafi ole vaavaai atu lea i taumafaiga a latou fanau ua mafai ona latou ausia le manaoga ole susuga ile faiaoga ia Polima Salima, e tatau ona to’a lelei ma ta le laau, ma ia vave foi le pue i lesona ia oloo fai agai iai le aoga, ae sili ai i loto o mātua ole tali manao o fanau ile naunau o mātua ia faaaogā o latou ola mo le Alii. Ole viiga ile Atua i mea aupito aluga, ona ua faamanatuina faatasi le faaaliga pianao ale fanau ma le atoaga ole lima tausaga talu ona faavae mai lenei taumafaiga ale susuga ia Poulima.

Ta’ua e Poulima Salima e faatauvaa lava lona tagata ile amataina mai o lenei faamoemoe mo le fanau, ae ana le seanoa le faatasi mai ole Atua ma le tatalo a nai ona mātua ma aiga ele mafai ona ausia ele aoga piano le lima tausaga faatasi ai ma le faaopopoina o fanau oloo naunau i lenei taleni.

E faafoi ai lava le viiga ma le faafetai ile Atua auā o ia ua mafua ai nei mea lelei ua faatinoina moa lo ma fanau.