O le faasalalauga a le Ofisa o Tagata Tafafao Maimoa mai i fafo faapea ua oo atu i le $300 miliona tala i le tausaga le tupe ua maua mai i tagata asiasi mai i Samoa, ua ta‘ua e lē o loo agaia galuega a le Minisita o Tupe, Afualo Dr Wood Salele, pei ua tele foi le faaopoopo.
O le lipoti aloaia ua faalauiloa o le tupe maua e pei ona saunia e le Faletupe Tutotonu, na ta‘ua ai o le tupe atoa na maua mai i lea atina‘e a le atunuu i le tausaga faaletupe ua mae‘a atu o le 2010/2011 e tusa lea ma le $306.3 miliona tala pe a faatusatusa atu i le $297.6 miliona tala na maua i le tausaga faaletupe muamua atu.
Faaalia e Afualo e telē lava le sese o lea lipoti auā na ia ta‘ua o le tele lava o le seleni o loo maua e mai i tagata Samoa lava ia o loo malaga asiasi mai i aiga ona o faalavelave, ae lē o tagata asiasi mai o loo fai ni faatau ma totogi auaunaga i le atunuu.
Faaalia e Afualo o le tupe moni lava o loo maua e atina‘e o Tagata Tafafao mai e ala i faletalimalo, faleoloa ma isi auaunaga e tatau ona i le va o le $200 i le $250 miliona tala.
O le tele o lea seleni o loo maua e faletalimalo tetele i le atunuu ae o i latou o loo fai apitaga tumatafaga ua mautinoa le faigata o le tau atia‘e i lenei vaitaimi, ma o le toatele ua talosaga ina ia iai se taimi e tuu atu e le Malo e taofi ai le totogi atu o le lafoga o le VAGST poo le lafoga o tau o oloa ma auaunaga ona o le leai o se tupe maua i le taimi lenei i le laiti o le numera o tagata tafafao mai o nonofo ai i ia apitaga tumatafaga.
E lei toatele lava nisi o iai se manaoga e agai latalata i le sami talu mai le sunami, ma o loo aafia ai lava le tele o nofoaga laiti faapea.
“O lea foi e maua o le toatele o tagata na asiasi mai o autaaalo, o tagata na asiasi mai i uo o loo nonofo i Samoa.
O fonotaga isi mafuaaga o le toatele o tagata e agai mai i Samoa,” o se faamatalaga lea a Afualo.
O le tausaga faaletupe lea na faato‘ā mae‘a atu na iloa ai le siitaga e tasi le pasene o le numera o tagata na asiasi mai i Samoa ae e lua pasene na sii ai le tupe faaalu a tagata asiasi mai i Samoa nai i lo le tausaga i ona tua atu lea na mafua ai le siitaga o le tupe maua mai i le atina‘e o tagata tafafao mai i Samoa i le $306.3 miliona tala.
E mautinoa le telē o le siitaga i le tausaga faaletupe lenei auā ua vaaia le tumutumu o Samoa i totonu o le tolu masina lea ua tuanai atu e oo mai i le taimi lenei.
O le vaiaso lava lenei e fā lelei fono a faalapotopotoga faavaomalo ma le Pasefika o loo usuia i Samoa.
E lē gata i lea o le tumutumu mai o tagata mo le vaiaso o le Teuila, o le tumutumu i le sauni ai i le agai atu a le Manu Samoa mo taaloga, ma o loo faaauau le agai mai o sui o le Pasefika auā foi isi fono tetele o le vaiaso fou.
Ua avea foi vevesi tulai mai i atunuu e pei o Fiti ua faaauau ai lava ona agai mai fonotaga a le itulagi i Samoa nei ma o loo faapea ona tele ai ma le tupe maua i tagata nei o loo maua e faletalimalo, maua e fale‘aiga ma isi auaunaga o loo faaaogāina e tagata nei e ui e na o le ta‘i vaiaso o loo faamautu ai i Samoa le toatele o i latou.
