Faaopoopo tiga ua lē mafai ona totogi le taui $800 afe

“Ua matou onosai pea ma saili se isi auala i le tulafono”…Afu Faumuina

Ua faaopoopo tiga ma mafatiaga i le aiga o le tina o Afu Faumuina ina ua taunuu a latou tauiviga i le totogi atu o le taui tupe o a latou meatotino na faaleagaina i le afi, i le faia o se tautinoga o le gau mativa poo le declaration for bankruptcy, ua lē mafai ai e nisi o matai ma tagata o Tanugamanono se toavalu sa faasaga i ai le latou mataupu, ona faaauau ona totogi atu le taui atoa e $833,000 o loo totoe.

O le toavalu na loka i le falepuipui i le malosi o le tusi saisai ona o le lē usitaia o le totogiina o vaega tupe o le taui atoa, ua toe tatala i tua, ina ua talia e le faamasinoga le talosaga a le latou loia ua lē mafai ona latou totogi le taui ona ua gau mativa.

O se isi faaupuga e faamalamalama ai lea tulaga, ua faia le latou tautinoga ua latou lē mafai ona tagolima i ni seleni, pe iai foi nisi meatotino e mafai ai ona latou faaauau le totogiina o le $833,000 o loo paleni, mai se vaega itiiti o le taui atoa sa poloaina ma faatonuina e le faamasinoga maualuga.

“Ua lagona lava le mafatia i le tulaga lea ua agai i ai le matou mataupu, ae ou te ofo foi i le mafai ona faia o lenei faaiuga, ae o lea faatoa amata ia Oketopa o le tausaga ua mavae (2014) ona totogi mai le taui o a matou meatotino na faaleagaina,” o le finagalo faaalia lea o le tina o Afu ina ua toe maua i ai se avanoa e fesiligia ai i le tatala ai i tua o i latou e toavalu sa loka i Tafaigata.

Mo le silafia e le aufaitau, o le isi matai e toaiva ai i latou na loka, sa toe tatala i tua, ina ua iai se gaioiga a lana loia sa faailoa atu ai i leoleo ma le faamasinoga, o loo manaomia le faia o se siaki faafomai a lea matai le susuga Matataualiitia Afa Lesa Samau, lea mafai ai ona tatala i tua i le Aso Toonai a o lumanai le Aso Sa o Tina, ma faapea ona tuua ai lava le atunuu i le aso lea. Ua maua ni molimau faatuatuaina ua toe taliu i Samoa lea matai.

Na fesiligia le Ofisa Sili o le Matagaluega o Faamasinoga ma Mataupu tau faamasinoga le tofa Masinalupe Tusipa Masinalupe, i aiaiga o galuega a le matagaluega pe afai e faaulu atu se talosaga mo le faia o se tautinoga o le gau mativa le declaration for bankruptcy.

Ua faailoa ai e le ofisa sili, o loo manino le tulafono e faasino i lea tulaga, a tuuina atu loa le tusi faamaonia o le gau mativa, ona ave lea i le tagata ua tofia e le Malo e ta‘ua o le Asignee, na te suesueina le faamaonia o se tautinoga faapea.

Pe afai e alualu le sailiga a le sui lea ae maua, o loo iai ni meatotino poo ni aseta a se tagata, e pei o fanua ma nisi aseta taugata poo ni teugatupe, o le a umia loa e le Assignee ma tuuina atu e totogi ai se aitalafu. “E lē faigofie le faia o se tautinoga auā e iai tua patatua o se talosaga e tuuina mai,” o le finagalo lea o le tofa Masinalupe.

I le tauiviga a le aiga o le tina o Afu Faumuina, ua saili atu se isi laasaga e oo i ai le latou mataupu i le latou loia. “O lea ua tusi le matou loia i le Komesina o leoleo, pe na faapefea ona mafai ona tatala i tua Afa Lesa, ma o le a tusi atu foi i le ofisa o faamasinoga e ave le tautinoga ua faia a le isi toavalu lea i le Assignee e suesue ai pe moni ua matuā gau mativa ua lē mafai ona tagolima i ni seleni e faaauau ai ona totogi mai le matou taui.”

O le faamatalaga lea a le tina o Afu ma lana faaopoopo mai e faapea, o le a taumafai foi le latou loia e saili se faamatalaga poo fea o iai le isi matai e toatasi lea ua lē aofia i le toavalu ua tatala i tua. O le faamoemoe o le aiga, e mafai ona faaauau e le tamalii e toatasi e lē o aofia ia i latou ua faia le latou tautinoga o le gau mativa ona totogi atu pea le latou taui.

O se alii loia o loo tuua‘ia e le aiga o Afu Faumuina, i lona faia o gaioiga e tatala ai i tua i latou ua toe saoloto mai le falepuipui o loo foufou e tauva i le palota tele a le atunuu i le tausaga fou.

O ia lea e pei ona faailoa mai e le aiga na ia totogi le $28,000 na nofo aitalafu ai i latou uma o loo faasaga i ai le totogiina o le taui. O le vegatupe lea o masina na tuai ona totogi atu amata mai i le masina o Novema o le tausaga ua mavae e oo mai i le masina o Ianuari o le tausaga nei.

E lei maua se avanoa e fesiligia ai lea alii loia, ae o ia foi lea na ta‘ua e Afu sa taumafai e totogi atu le $14,000 na nofo aitalafu ai i latou lava ia o Tanugamanono, peitai sa latou teena lea seleni ina ua suia le latou loia ma faia ai loa le malosi o le tusi saisai na mafua ai ona taloka.

Faaalia e Afu o le Aso Toonai 9 o Me 2015, na oo atu lea alii loia ma le seleni i lo latou fale ua faamautu ai nei i lo latou fanua umia saoloto i Vaitele fou. Sa taumafai atu lea fuafuaga ina ua taloka le toaiva e leoleo.

O se auala lea na taumafai e toe tatala ai i tua peitai o le mau sa ave i ai e le aiga, o le tusi saisai ma lona malosi e pei ona faamalamalama atu e le latou loia, seiloga e totogi atoa le $833 afe.

O le amataga lea o le gaioiga na mafai ai ona tatala i tua le tasi o matai, ae loka pea le isi toavalu. O le afuaga foi lea o le agai o le loia a i latou na faaauau pea ona loka i Tafaigata e faia le talosaga mo se tautinoga o le gau mativa lea ua talia e le faamasinoga ma ua saoloto uma ai i latou e toavalu.

O le tina mafatia o Afu Faumuina