I lipoti mai taitai o ausavavali i itu eseese o Aukilani oloo faatino ai lenei polokalame ile faamalosia ole savali ile ola soifua maloloina lelei o tagata, ua faailoa mai ai e taitai le faatuputupulaia pea ma le faaopopo o tagata o lea ua auai.
E pei ona tuuina mai le lipoti ile itu i Sisifo o Aukilani ile faaiuga ole vaiaso ua mavae ile Aso Faraile ele susuga ile faafeagaiga ia Suluape ua silia ile 90 tagata o lea ua mafai ona faatasi atu ile savali lenei i Sisifo, ao lenei fuainumera tele oloo maualuga ai le numera o tina ma tamā matutua i lea foi pitonuu.
Ole amataina ma le suiga ua iai lenei tausaga, ua amata ile savali taamilo ile taeao ona sosoo lea ma le Zumba i totonu ole hall lea ua mafai ona faataunuuina ai polokalame a lenei ausavali ile faaiuga ole vaiaso ile Aso Faraile ma le Aso Toonai, ona faaiu lea ise talanoaga e faaleleia atili ai le savaliga ile lumanai.
Ile saunoaga ale susuga ile faafeagaiga ia Suluape ua tele le suiga ua iai le amataina o lenei tausaga mai le tausaga ua mavae, e pei ona faatoa tau amata ona fofoa mai ai le savali ile West.
Ua tele tagata ua faaaopopo ma ua iai foi le fiafia o tagata uma e faatāua lenei avanoa mo le soifua manuia o tagata uma.
Ile pitonuu i Manukau ile nofoaga oloo iai le ofisa ole leitio oloo iai le savali sa faavaeina lenei polokalame ma o se vaaiga foi lea ua see malie iai lenei itu ole walking Samoa ua iai foi nisi o tagata faaopopo lea ua mafai ona faatasi mai i aoauli o Aso Faraile ma savavali faatasi ma nisi ole aufaigaluega ole leitio faapea nisi oloo nonofo i Manukanu.
O le faaiuga o Mati o lea ua fuafua ai ele komiti faafoe ole Walking Samoans i Aukilani e fai ai se savali tuufaatasi a ausavavali uma lava mai pitonuu taitasi, ma e oo mai ile taimi nei e lei manino mai se faataotoina ose polokalame ole aso e pei ona fuafuaina, ae ole agaga maualuga i lea faamoemoe ole a mafai ona feiloai ai ausavavali uma mai vaega eseese o Aukilani e pei ona iai lenei polokalame.
I faatalatalanoaga i luga ole leitio i aso taitasi ole vaiaso o lea ua faaaogāina mai ai sui o komiti o au savavali taitasi latou te lipotiina mai ni mea oloo tutupu mai vaega eseese ole walking Samoan ma o se suiga tele lea ua mafai ona faaaogaina mai nai tama ma tina oloo taitaiina au savavali taitasi.
Ole faamoemoe maualuga ole komiti oloo iai ia oo atu ile isi masina fou ua iai foi se isi o savali ua toe faaopoopo i totonu o lenei polokalame.
