Tautino Seumanutafa Taulapapa Imo Leung-YID ile tāua o le savali
Ua tele ina faatāua e le mamalu o le atunuu le taualaga ale leitio Samoa ma nisi o tamalii oloo alagaina le Walking Samoans ia Teleiai Pa‘u Edwin Puni ma Sooalo Setu Mua, le mamalu o le atunuu e agai mai e faatāua le savali auā le soifua maloloina lelei.
A o le tala lelei ma le tala fiafia ua uigaese le tulai mai o le ausavavali ale Walking Samoans ile itu i Sisifo o Aukilani e pei ona amatalia ai le latou ausavavali ile lua vaiaso talu ai.
E silia ile 80 tagata ua auai i lenei polokalame e aofia ai tamā ma tina matutua, o fanau aoga ua faatāuaina le savali auā le soifua maloloina lelei o le tagata.
O le afioga ia Peseta Savea Al Harrington Lavea ma le susuga ia Titiula Tuigamala oloo taitaiina le Walking Samoans ile itu i Sisifo, ma o se faataitaiga lelei foi lea mo tagata uma ona o le lagolago malosi a susuga i faafeagaiga oloo savavali faatasi ma le mamalu o le atunuu, ma ua faaopoopo ai nei le isi vae o le Walking Samoans i Aukilani lea ua see atu ile fā ona vae.
O le molimau ale afioga ia Seumanutafa Taulapapa Imo, e lē aogā tagata matutua ua silia ile ta‘i 60 tausaga le matutua i Niu Sila, i lona lagona e aogā tagata matutua i Samoa auā foi e alausu a‘e ile taeao vele le vao, savali atu ile isi aiga, lalaga le fala, sasa le ‘afa ale toeaina ma e maua ai le malosi. Ae o Niu Sila e faigata ona maua se isi malosi fou o tagata matutua ona e leai ni feau masani e pei o Samoa.
Ae o le tāua ia te ia o le Walking Samoans e pei ona savali ai i Magele i Aso Lua, o le savali i Otara i Aso Tofi ma le savali i Avondale i Aso Faraile, ua maua ai se avanoa e savali ma mafuta ai ma isi tagata o le atunuu.
O ia foi sa lavea ile pasika ma sa faaletonu ai lona vae taumatau ae sa faafaigata foi ona savali, ae ina ua auai i lea polokalame ua iai le suiga tele i lona vae. E ui ile fagata ile taimi muamua lea sa savali ai e lē umi ae toe foi ile siopi, ae ua alualu le faamalositino ua atoa le 2 masina o auai ile Walking Samoans, lea ua telē le mamao ua oo iai lana savali ma o lona fiafiaga tele lea i lenei polokalame auā ua atoa le 70 tausaga o lona matua ae ua alu ile atoa.
O lana luitau i tagata matutua, aua le nofoai ile fale auā na o le pepē o le tino pe a umi ona taoto ae tatau ona tulai ma savali e suia ai le faalogo ile tino.
