Faaopoopo le isi auaunaga ale ChoiceKids mo fanau

Nisi o tama fanau Samoa oloo galulue ile ChoiceKids
Nisi o tama fanau Samoa oloo galulue ile ChoiceKids

Ole taeao ole Aso Toonai ua mavae 22 o Aperila na tatala ai le isi auaunaga fou ale ChoiceKids mo fanau aoga i Flat Bush i Otara. O lea fale fou ose isi lea auaunaga ale susuga ia Paul ma Peter ua fuafua e taulai pe maea tasi uma ai tiute tauave ale ChoiceKids i totonu o Aukilani.

E tele lala a lenei kamupani i totonu ile itu i Saute o Aukilani ile pitonuu o Manurewa lea ua silia ile 12 aoga e pei ona iai ae pau lea ole fale fou o lea ua motu ese mai lona tulaga ona ole naunautaiga a lenei aualii ina ia fausia se isi fale e tapuvaetasi uma iai galuega ale ChoiceKids.

Ole Aso Toonai la sa faailoa ai e Paul ma Peter ile mamalu ole atunuu sa tumutumu ai ile tatalaina ole fale fou i Flat Bush nisi o ana auaunaga ma galuega lea ua fuafua e faia i totonu o lea fale fou, ma ua uma foi ona vaevaeina totonu ole fale e ala i ana galuega faatino.

E fogafalelua le fausaga ole fale oloo iai, ae ua fuafuaina ele susuga ia Paul ma Peter le isi vaega pito i lalo ole fale mo aoga ale fanau, ole ogatotonu ile pito i lalo ua faamoemoe lea e faia ai se faleaiga e tufa fua mo fanau aoga aemaise mo tagata lautele e agai atu e avatu fanau aoga ae faapea foi i tagata lautele oloo fai atu e fia manaomia le tautua ma le auaunaga ale ChoiceKids.

O nisi o potu ua faatulaga lea mo taaloga a tamaiti e pei o play station e mapu iai ae faapea foi ma le potu ua saunia mo computers ale aoga.

Ole pito i luga ole fale ua fuafuaina lea aua ofisa autu uma ole aoga ma o i foi lea ua tapuvaetasi uma iai ana galuega faatino i totonu o Aukilani. Ua faamanino foi e Paul ma Peter ua maea ona faatalatalanoa nisi ole aufaigaluega ua agavaa ma ua talafeagai ma galuega i totonu o lenei fale.

Ole tapenaga o fanau laiti ile lumanai ma le agai atu i aoga maualuluga e amata atu le fofoaina ole olaga aoga i aoga laiti, ma a lelei le tapenaga ma le fausiaina ole olaga aoga ole tamaititi ile amataga, ele taumate foi lona taunuuga lelei ile lumanai, ae ole a faafaigofie ai foi tiute a isi faiaoga oloo agai atu iai.

A lelei foi mea faigaluega e faatino ai aoga ale fanau ole tasi foi lea fesoasoani malosi ile tapueina ole olaga aoga ole tamaititi.

Ile lolofi atu ole atunuu ma fanau ile Aso Toonai na maitauina ai e tagata e ese foi lagona o nei aualii i fanau ole atunuu, ua tapenaina uma mea taalo mo fanau, o mea e faaaoga e vali ai mata o tamaiti, o meaai eseese ma vaiinu aua le fofoga taumafa aemaise ai ole aufaigaluega sa galulue i vaega eseese i totonu ole lotoa sa faailoa lo latou laufofoga fiafia ile apoapoina lea o fanau ma faatafafao solo ma faamatamata le mamalu ole atunuu i totonu ole fale.

O nei auaunaga uma sa leai se tupe e faatauina ai ae sa tufa fua uma mo le lautele ole atunuu, ona ole agaga o Paul ma Peter ia maua le agaga ole alofa i tagata.

E latalata ile 20 tamafanau ole atunuu o Samoa oloo galulue ai i totonu o lenei kamupani ma ose fiafiaga sili lea ile mamalu ole atunuu ona oloo iai ni Samoa oloo faigaluega ai i totonu e mafai lea ona fesoasoani ma fesootai i o tatou lava tagata e ala ile gagana, aemaise lava i tagata matutua oloo agai atu ile aoga.

Ua faamanino mai foi ile tele o vaega eseese ole ChoiceKids i totonu o Aukilani e silia ile 50% o fanau oloo auai i totonu ole aoga o fanau Samoa.

Ole aso 29 o Aperila ua iai le faamoemoe ole pulega ole kamupani ale Choice Kids olea tatala aloaia uma ai loa galuega faatino i totonu o lona ofisa poo le fale fou lenei i Flat Bush, ma amata ai loa ana galuega faatino aua le manuia o fanau aoga mole lumanai.