Faaoomanu‘a ile toalua ile sapelu

Le tina ia Tiperia Afamiliona ma lona toalua o Atinae Afamiliona
Le tina ia Tiperia Afamiliona ma lona toalua o Atinae Afamiliona

Ua toe agiga foi i Sini le igoa o Samoa ise faalavelave matautia ile aai o Campbelltown lea ua molia ai nei le tamā ia Atinae Afamiliona i lona faaoolima ise agaese e taumafai e faaumatia le soifua o lona toalua ia Tiperia Afamiliona mai se feeseeseaiga na tulai mai i le vaiaso talu ai.

Na maua atu lava e leoleo le tamā ole aiga i lo latou fale ile taliu atu o ia ina ua mae‘a ona momoli atu le tina sa faamanu‘alia tuga ile falemai i lea lava po.

Ise ripoti mai a leoleo na tagi ma ootia lenei tamā ile taimi na tulai ai ile faamasinoga e tali ona moliaga, ile vaai atu i o la alo faapea aiga ma uo sa faatasi atu e lagolago lona tulai ai i luma ole tulafono.

O tamailima ma tamaivae aemaise vaega o vae ole tina sa matuā afaina i lenei osofaiga a lona toalua i lenei faalavelave.

O Tiperia Afamiliona e lei leva talu ai nei ona taliu mai sana faigamalaga mai Samoa. Ose aiga oloo tapuai ise tasi o Ekalesia Faavae i totonu o Sini nei ma o lipoti a sui ole aiga ole tamā ia Atinae Afamiliona, o ia ose ‘Tagata Lelei’.

Ua taofia nei le tamā ile falepuipui e talitali ai le toe tulai i luma ole faamasinoga ile faaiuga ole masina nei, ae ole tina oloo taofia pea ile falemai i Liverpool mo togafitiga ae ua faasolosolo manuia.

Ole fanau foi ua toe taliu atu i aoga male loto mafatia talu lenei faalavelave.

Ole pitonuu na tupu ai lenei faalavelave i Campbelltown oloo tulata iai le Falemai i lea aai ae na toe siitia mai le tina ile falemai tele i Liverpool, oloo taofia ai pea ile taimi nei.

Ua amata nei foi le pesepese male taulogologo o faalapotopotoga oloo unaia le taofia o sauaga o tamaitai ma fanau, ina ia taofia nei uiga lē lelei ua pei ose faama‘i le saosao faaafi i nei aso.