O tapenaga a kolisi maualuluga e sefulu tasi mai Upolu ma Savaii sa tausinio i le faaaliga o tu ma aganuu le ‘Samoa ne‘i Galo’ o lenei tausaga 2015, e leai se kolisi e lei lelei tapenaga i vaega togia uma.
O se galuega faigata lea mo faamasino sa faamasinoina le tauvaga, peitai na taunuu lava faamasino i se faaiuga na faaalia e nisi o se faaiuga fetaui lelei ma le latou foi silasila ma le vaai. Sa faasalalau e le TV1 i Mulinuu polokalame uma o le tauvaga mo aso e lua ma o le molimau foi lea nisi sa maimoaina i televise le faamoemoe o alo ma fanau i le talafeagai o le faaiuga.
Ua tutusa le Kolisi o Maluafou ma Leifiifi i le siamupini i le vaega o le siva mauluulu, ae sola le aoga o le DonBosco mai Salelologa Savaii ma le siamupini o le siva faataupati.
O le kolisi o Safata ua siamupini i le siva Taupou, na maua le Ipu ma le faailoga tupe e $1,500 faapea pepa tala oloa e $300 tala lona tau aofai.
O le faaluma ua maua e le Kolisi mai Savaii o le Itu o Tane, o le Ipu foi ma le faailoga tupe, ma le Lauga ua toe siamupini ai le Kolisi o Sagaga.
O le tausaga ua mavae le uluai tausaga o lenei faaaliga na maua ai foi e lea kolisi maualuga le manumalo i le itu o Lauga. O le tauvaga aufaipese faaleaganuu ua maua lea e le Kolisi o Maluafou ma ua lua ai siamupini ua faamanuiaina ai lea kolisi a le Ekalesia EFKS.
O le molimau a se tasi o failauga o le atunuu o loo galue i le Matagaluega o Aoga, Taaloga ma Aganuu le tofa Mataafa, o lana matau i tapenaga e lelei uma, peitai o le tasi o vaega ua ia molimauina ua lē lelei ona faatino, o pese mo taualuga ona e lē atoa leo e taulagi ai le usuina o pese siva faasamoa, ae o nisi foi o pese na filifilia e faia ai taualuga a kolisi na tausinio lea na siva ai ma a latou taupou e lē fetaui.
O le molimau a lea tamalii atonu o se isi lea o vaega o le a ave i ai le faamamafa i le tausaga fou, o pese siva faaleaganuu.
E ui sa faasalalau e le TV1 le polokalame atoa o le tauvaga peitai sa matuā faatumulia le malae i Tiafau i le toatele o le atunuu sa latou maimoaina le tauvaga aemaise o mātua o alo ma fanau faapea o latou aiga ma uo.
O se isi lea o tala tuu mumusu a nisi sa maimoaina le faamoemoe, o se faaaliga e ese le tāua ma aogā mo alo ma fanau ona ua toe faaolaola ai io latou mafaufau ma loto le tāua tele o siva ma pese faasamoa aemaise o le faia o lauga e mafai ona tautatala ai i luma o tagata i ni faatasiga tetele, ae lē gata foi i lea o le aogā mo le lumanai o fanau a le atunuu ina ia teufatu pea le gagana Samoa.
