Ua faitauina o le sikoa a le alii Samoa o Krisnan Inu i le taaloga a le Auckland Warriors ma le au malosi a le Wests Tiger, sa toe maua ai le avanoa o le au e tasi a Niu Sila i le taamilosaga a le NRL, e laasia ai le isi sitepu maualuga, na ausia ai le avanoa taua e finauina ai le taaloga ma le isi foi au malosi a le Stormers i le faaiuga o le vaiaso talu ai.
O le toe ta’ua o le sikoa a le alii o Inu, ona o le vae lea o le apefai, na toe aea ai le isi laasaga taua mo le Warriors. O se tasi o tama taalo, o loo faatulagaina foi e le NRL, o se tama malosi toe agavaa i lona soifua taalo, mai lava i le amataga i nisi o kalapu sa taalo muamua ai. O le toe foi mai o Inu i le Warriors, o loo ta’ua ai le toe faaolaina o le au, ina o tau mavae ma mu itiiti lona malosi i lona taumafai mo lenei tausaga.
Sa fetaui lelei le toe filifilia o Inu, ina ua manu’a le alii o Manu Vatuvei, ma e pei ona ta’ua i le tele o lipoti, o Inu na ia toe aumaia le vaa faaola ma le malosiaga mo le au a le Auckland Warriors, na ia maua ai le avanoa mulimuli ma ua toe faitauina ai le isi foi avanoa mulimuli foi mo le taumafai o le au liki a Niu Sila, i le taamilosaga o le 2011.
O Inu o se tama taalo e tele foi sona agavaa, ma e maualuga tele foi lona faatinoina o le taaloga, mai lava i le tele o kalapu sa uluai taalo ai.
O se tama taalo foi e mafai ona ia tauaveina pe taalo i le tele o tulaga i totonu o le malae. Na uigi i le taaloga ma le Tigers, peitai na toe faasee ane i le tulaga ogatotonu poo le centres, i le taaloga ma le Stormers.
O le avanoa faaauro ua toe faitauina ai le Warriors, ua vaavaai nei i ai ma ua valoia foi e le toatele, o le a ono manuia ana taumafaiga mo le ipu autu o le taamilosaga o lenei tausaga.
E lei faigofie taaloga ua tuanai a le au, aemaise lava, o le taaloga ma le Stormers, ona o se tasi o au aupito malosi ma le faigata i le taamilosaga.
O le tulai o alo o Samoa i lenei vaitau mo le au liki a Niu Sila, le Warriors, ua matua taua tele ma faamauina le tele o le laua sao mo le toe aumaia ma le tuuina o Niu Sila i se tulaga taua ma le maualuga mo le 2011. O loo mamafa ma atoatoa le talitonuga, o le a faataunuuina e le Auckland Warriors lana miti ua leva ona tuli mai le tele o tausaga. O le susuga ia Krisnan Inu, ma Ben Matulino, o alo o Samoa o loo la faaauauina pea le tauaveina o Samoa, mo lea foi taaloga taua i le va o Niu Sila, Ausetalia, Peretania ma isi atunuu o le lalolagi.
