O le usu a lele a le afioaga o Vailoa Aleipata na molimauina na tasi uma ai le afioaga sa tele ni tausaga o vaeluaina ina ua faia le faafotutupu o le suafa Puepuemai i le taeao sesegi o le Aso Lulu 24 o Iuni 2015.
E iva suafa na faaee ai faatasi ai ma suafa tulafale e ono o le Alaifaiva. O le uluai taimi lenei ua tatala ai le suafa Puepuemai i suli e tolu ua faasino i ai le pule o le suafa ona o le mau a se tasi o suli le susuga i le faifeau Isaia Puepuemai, ua tupu ma ola le aiga, ma o se faiga sili lea ona amiotonu e maua ai le nofo lelei o aiga. O le faafotu sa auai mamalu faalupe o le nuu i le afio o Alalamalae, afio le Sa‘ofetalai ma le Falelima, afio le Aomavaega o le Alo o le Tuiatua, ma le mamalu ia Tualemoso ma Salele‘a Alii ma Saleaumua.
O se aso na vaaia ai le laufofoga fiafia o tagata uma, ona ua pale nisi i suafa o aiga oi latou o le a avea ma taitai e tausia le mamalu o nuu ma aiga, aemaise o le tausia ai le nofo lelei, fealofani ma maua ai le filemu.
Na saunoa le susuga Isaia Puepuemai, o le tausaga e 2009 na tuumalo ai se tasi o le aiga sa umia le suafa, ma avanoa mai ai lava. Peitai o le mae‘a o feiloaiga a suli ma faatalatalanoa ni matai i le suafa, e pei lava o aga masani a soo se aiga Samoa, na tasi ai loa o le a faatino ae o le a tatala loa le suafa i suli e tolu.
Na saunoa le faifeau o se tasi lea o faiga lelei tele e lē gata ina maua ai le nofo fealofani, ae o le pulupululima faatasi ai e faatino se faalavelave. E māmā ai le avega ma faigofie, e lē mamafa pito tasi ai le amo o loo tauave e soo se aiga i taimi e faia ai ni faalavelave tetele.
O le susuga Isaia sa ia umia nisi o suafa o lona aiga aemaise le suafa Tulafale o le Alaifaiva peitai na aveese ina ua ulufale i le galuega a le Atua ma avea ai ma faifeau e pei ona la tausia ma lona faletua le ekalesia Metotisi i Asau i Savaii.
O le finagalo o le faifeau o tausaga e tele sa ia umia ai suafa matai o lona aiga ma lotolotoi i meafai a le nuu ma le aiga, ua lava ai lona silafia i le mea e tatau ona saili ai le filemu ma nofo lelei tagata o aiga.
O le toaiva ua faaee i ai le suafa Tamalii o Puepuemai Asolelei, Puepuemai Asafo, Puepuemai Apelu o le alo lea o le susuga Isaia, Puepuemai Ualesi, Puepuemai Tuu, Puepuemai Tolufale, Puepuemai Fetu, Puepuemai Leatuta‘atasi, ma le tamaitai le afioga Puepuemai Emi.
O le suafa Tulafale o Alaifaiva Lemoe Futi, Alaifaiva Saolotoga, Alaifaiva Tauli, Alaifaiva A‘emalemalo, ma Alaifaiva Faaiuga.
O faaaloaloga masani sa ma‘au i ai Nofo o tupe ma tatala foi ie o auafa ma ie o moegalafo na faaaloalo ai i le faafeagaiga aemaise o le paia eseese o le afioaga.
