Ole Komisi suesue ale Palemene ma le latou suesuega ile faatinoga o galuega ale Faamasinoga o Fanua ma Suafa na faia le fautuaga ile Palemene ia aveesea le toe faia o soalaupulega o mataupu a aiga e alii ofisa sinia o sui lesitala ole faamasinoga.
Ole suesuega a lea komisi na tuuina atu ai ni molimau mai le atunuu na ta’ua ai le faaletonu o a latou mataupu ona o sui lesitala e faia soalaupulega e iai o latou pi’itaga i itu a aiga e aafia ini mataupu e oo ile faamasinoga o Fanua ma Suafa.
Ole fautuaga lea ua faatino nei e le Matagaluega o Faamasinoga ma le faafoeina o mataupu tau faamasinoga e pei ona tautino le afioga ile Minisita Faaolesa Katopau Ainuu e ui ini lape ole faamasinoga ae le tuua ai le mea e tatau ona fai.
Na faailoa lea tulaga e le minisita ina ua faia se sauniga na tauaao aloaia atu ai soalaupulega o mataupu e oo ile Faamasinoga o Fanua ma Suafa ile asosi o Tufuga o Faatofala’iga a Samoa le AMSA.
Ole Peresetene ole asosi le susuga Leiataualesa Jerry Brunt na tali fuaitau ile saunoaga ale Minisita ma sa ia faafetaia le matagaluega ile faatuatuaga ua lafo atu e faatino ai e Tufuga o Faatofala’iga ua aoaoina mo le faia o lea tautua soalaupulega o mataupu.
Ose tautua e manatu le Peresetene e lē aveesea ai le sao ole ofisa o faamasinoga e galulue faatasi ma le AMSA. Ole soalaupuleina oni talosaga poo ni tagi e oo ile faamasinoga o Fanua ma Suafa ua faamalosia i aiaiga o galuega tau faamasinoga. O lea faamalosia e tatau ai ona faia muamua soalaupulega ile va oni itu e aafia ise mataupu e saili ai se auala filemu e maua ai se finagalo autasi e aunoa ma lē oo ose mataupu e suesueina ele faamasinoga.
O mataupu e oo ile faamasinoga maualuga sa amata ai le tautua a Tufuga o Faatofala’iga ae ole taimi muamua lenei ua aofia ai ma mataupu ile faamasinoga o Fanua ma Suafa.
E talitonu le toatele ose faiga lelei lea ua le toe aafia ai sui lesitala ma ofisa sinia ole faamasinoga ona latou faia ia soalaupulega ona oi latou o loo taunuu iai mataupu ma faatulaga foi le faagasologa ose mataupu i taimi e oo atu ai mo le suesueina e le faamasinoga. Ole tausaga ua mavae na faauu ai foi nisi tagata ua a’oa’oina mo le faia o soalaupulega.
