O fuafuaga a le Malo a o tulai mai le faipule o Palauli le Falefa le afioga Faumuina Tiatia Liuga ma Minisita o Tupe, sa faailoa ai le talaina i lalo o le Maketi i Savalalo ae fausia ai le nofoaga tutotonu o fefaataua‘iga poo le Trade Center.
Na alualu ia fuafuaga faasee ese le faipule ma le tofi minisita ina ua faamavae, ae galoma atu ai ma lea fuafuaga.
Sa toatele le aufaipisinisi laiti sa faanoanoa ina ua ta‘uta‘u lea fuafuaga a le Malo ona ua lē iloa poo fea o le siitia i ai a latou pisinisi. Peitai na toe maua le loto fiafia ina ua faaauau pea ona faaaogā le maketi i Savalalo mo a latou atinae o loo maua ai nai tupe.
O lea la ua faamuta a latou taumafaiga ina ua faafuasei ona mu le maketi i le Aso Toonai na tea nei ma ua motusia ai ma pisinisi aemaise o seleni sa tausi ai aiga ma totogi ai isi tautua aemaise lava o nai nonogatupe laiti poo nisi lava fuafuaga faaleaiga.
O le vave o le tala ave i le faalavelave na vave ai ona tumutumu atu le atunuu i le nofoaga o iai le maketi i Savalalo i le afiafi o le Aso Toonai na tea nei 16 o Ianuari 2016 ona o le fia silasila ma faitatala i le mu o le flea maketi.
E taunuu atu le tusitala ua tele ina mu atoa le fale ae ua na o nai apa o loo totoe i le itu i Sisifo latalata i le isi fale sa avea ma faleoloa o le au faifaatoaga lea o loo faia ai nisi o pisinisi laiti e pei o faleaiga ma fale e faatau ai lavalava ma galuega taulima.
E tuuina atu lenei lipoti mo le faasalalauina e lei maua se faamatalaga manino mai leoleo ma le fuimu i le mafuaaga o le afi. Peitai o se tasi o taulealea e faigaluega o se leoleo o le maketi poo se sikulati na ia faamatala e faapea na amata mai le afi i totonu o se faleoloa ua loka.
Na iloa e nisi sa iai le afi i le taimi faatoa amata ma logo ai loa le fuimu. Na faamatala le taulealea (taofia le suafa) na umi se taimi o faatali le fuimu ma vaaia loa ua sasao a‘e le afi mai totonu o le faleoloa ina pāpā ni fagu kesi ogaumu sa iai i totonu.
O le molimau a le taulealea o le ogaumu e tunu ai le suati e faatau a le tagata o loo lisi ai i le faleoloa. Na faaalia lava e le molimau na taumafai nisi e la‘u ane apa ma paelo vai e asu atu i le mu o le faleoloa ae ua faifai tetele ona ua pāpā fagu kesi.
Na faamatala le taulealea faigaluega o le maketi i le tusitala e taunuu atu le fuimu ua lē toe mafai ona fai se galuega fesoasoani e faasaoina ai le maketi atoa ona ua lilofia uma i le afi.
O le itu i Sisifo o le fale e latalata i le isi nofoaga o loo iai isi pisinisi e sosoo ma le Faletupe o Atinae na taumafai le fuimu e faasao ina ne‘i sosolo atu i ai le malosi o le afi. E tea le valu i le afiafi ua amata ona fai ifo le mu ma ua mafai ona titina.
O le tele o pisinisi laiti sa faagaioia i totonu o le maketi e pei o poloka e faatau ai lavalava ma galuega taulima, o faleaiga ma faleoloa e iai le talitonuga e lē o iai ni inisiua.
O totonu foi o le maketi i Savalalo o loo iai le ofisa o le Faalapotopotoga o Eleele a Samoa le Samoa Land Corporation.
E tupu le mu ua tapuni le maketi ua toatele le aufaipisinisi ua agai io latou aiga ma nuu. O le a tuliloaina pea suesuega a leoleo ma le fuimu i le mafuaaga tonu o le mu.
E leai se soifua na aafia ae o meatotino uma sa iai a le aufaipisinisi e leai se mea na faasaoina. O le tau o mea uma ua faaleagaina e aofia ai le fale atoa e lē o iloa.
