Ole faaiuga ole vaiaso na matuā iloga ai le toasa ole Canberra Raiders i lana taaloga male ‘au malosi a Manly Sea Eagles na manumalo ai i ‘ai e 42-30.
O lenei manumalo mataina ua see atu ai nei le Raiders ile tulaga lua ole taamilosaga ua lamalama faaiu ma ua tulimatai ai nei ose ‘au e ono sola male siamupini. Oloo tulaga muamua le Storm ae sosoo atu ai le Raiders.
Ole alo o Samoa ia Joey BJ Leilua na vaaia ai foi le atili sasao ai o lona toasa i ana sikoa e lua na maua ma fesiligia ai pea le tuai ona piki e Laurie Daley mole NSW Blues. Ole ‘au a Manly e lē faigofie auā sa omai sauni e manumalo ma faamavae atu ai ise tasi o a latou toa manumanu ia Jamie Lyon mo lana taaloga faaiu talu ona taalo mai ile tele o tausaga.
E ui foi na vaaia le malosi o taumafaiga a isi alo o Samoa oloo taaalo ia Manly e pei o Martin Taupau ma Jorge Taufua lea na lavea, ae sa mautinoa ele Raiders ole lelei ole puipuiga e sao atu ai ile taamilosaga ole pa‘ū ma nofo. Sa sikoa foi le alo o Samoa mo Manly ia Frank Winterstein, peitai, e lei mafai ona toe maua ‘ai ole Raiders.
Ole sikoa ale Raiders ile sefulu minute na maua lea e Paul Vaughan sosoo ai male sikoa muamua o sikoa e tolu a Jordan Rapana. Ole amataga ole ‘afa mulimuli na vaaia ai le vevela o ogaumu ale alii o BJ Leilua ina ua sao atu lava i luma atu ole ‘afa ole malae ma kamikami atu ai mo lana sikoa muamua faatoa lua minute talu ona amata le ‘afa mulimuli.
Ole isi ana sikoa na maua ile fā minute na sosoo ane ai, ma vaaia ai loa le mamao o ‘ai ma maitauina ai foi le tau faavaivai ole Sea Eagles. O isi sikoa na atili mamao ai ‘ai a Canberra na maua lea e Edrick Lee, Jack Whitcombe, male sikoa lona tolu a Jordan Rapana ole sikoa mulimuli foi lea ole taaloga ma tulai mai ai ‘ai faaiu ole taaloga ile 42 ale Raiders ile 30 ale Sea Eagles.
