Falemiga Selesele

Falemiga Selesele

Ua faamavae aloaia mai ai nei le susuga Falemiga Selesele mai ile ‘au taitoafitu ale Manu Samoa a’o faagasolo ai vae eseese ole taitoafitu ale IRB mo lenei tausaga, faatasi ai ma le tapena atu i taaloga ale Taupulega e faia ai i Gold Coast Ausetalia ile masina o Aperila ole tausaga lenei aemaise foi le Ipu ole lalolagi e faia i Amerika ile masina o Iulai.

Na faamaonia mai ele alii faiaoga ole taitoafitu o Sir Gordon Tietjens le faamavaega a Selesele mai le ‘au ale atunuu ae saga’i ane ile taaloga ole lakapi 15 mo lana konekarate ile kalapu a Hawke’s Bay i Niu Sila.

Ta’ua foi ele Ofisa Sili ole Iuni Lakapi ale atunuu le susuga Faleomavaega Vincent Fepuleai, ua telē le sao o Selesele ile lakapi ale atunuu aemaise lava ile ‘au taitoafitu. E manatua pea Selesele ile taimi o taalo ai ile taitoafitu ina ua siamupini ai le Manu Samoa Sevens ile vae ole taitoafitu i Pale i Farani ile tausaga e 2016.

Ise talanoaga a tatou tala i taaloga ma le susuga ia Selesele na ia ta’ua ai, ole a ia alu e faauma lana konekarate e tasi le tausaga o totoe ai nei ile kalapu a Hawkes Bay mo le taamilosaga lakapi faaitumalo a Niu Sila le Mitres 10 Cup ile tausaga lenei. Ole naunautaiga o Selesele ina ia maua ai sona avanoa mo se ‘au ole supa lakapi poo le super rugby aemaise lava le faatumutumuga o lona olaga taalo, ole fia maua ai lea o sona avanoa ile ‘au ale Manu Samoa 15.

O Selesele oloo aumau ai ma lona faletua i totonu o Niu Sila ile taimi nei, na ia momoli ai lana faamanuiaga i alo ma fanau ole atunuu ua filifilia ai ile ‘au taitoafitu ale Manu Samoa mo le taamilosaga i Las Vegas i Amerika ma Vancouver i Kanata. Ile ‘au ale Manu Samoa e pei ona faalauiloa mai ai ele alii faiaoga mo ia vae e lua ole taitoafitu ale IRB na misia ai le suafa o Selesele, e na’o le tasi lava le suiga o lea ‘au mai le ‘au na tausinio ai i Sini Ausetalia ma Hamilton Niu Sila talu ai nei, ole susuga lea ia Falemiga Selesele ua lē filifilia ae ua suitulaga iai se tasi o sui iloga ole taitoafitu le susuga ia Tomasi Alosio.

O nisi o suiga ole ‘au lenei ua faaopopo ai le tama taalo e toatasi mai le to’a sefulutolu talu ai, na ta’ua e Tietjens, ua mafua ona ave uma le 14 o tama taaalo ona e fai si mamao mai o Amerika ma Vancouver i Samoa, afai la e faamanu’alia ai se isi tama taalo ole to’a sefululua muamua, ae oloo iai pea isi tama taaalo e toalua oloo faaleoleo ai.

Ose tasi o tama taalo oloo misia ele ‘au ile taimi lenei ona o manu’aga o aafia ai, ole susuga lea ia Alamanda Motuga ma e tatau ona toe amata koleni ai ini nai vaiaso o i luma, saunoaga lea a Tietjens. Fai mai le alii faiaoga, ua amata ona siitia maualuga le taaalo ale Manu Samoa taitoafitu, ma ua faigata foi le filifiliga ole ‘au i soo se taimi e malaga ai ona ua taufai tausinio uma tama taaalo mo se avanoa e malaga ai i taamilosaga ale IRB.

Na momoli faamanuiga a Sir Gordon Tietjens ia Selesele i lana miti o tulituli nei ile fia maua ai o sona avanoa mo le Manu Samoa 15, aemaise ose konekarate i nisi o atunuu e mamao. Ose tasi o vaega na maua e a tatou tala i taaloga ile ‘au ale atunuu, ole tutusa uma lea ole faiga ele alii faiaoga i tama taaalo ma e leai foi se faiga faapitoa mo se tama taalo e toatasi tusa lava poo se senior player.

Ose tasi o taamilosaga talu ai ale IRB a’o tapena ai le Manu Samoa i lana taaloga e sosoo ai, na molimauina ai ele alii faiaoga le faaaogāina pea e se tasi o senior player o lana telefoni feavea’i. Na sesele motu ele faiaoga lea tama taalo mai ile taaloga na sosoo ai, mulimuli ane talanoa iai Tietjens ile lē taliaina o lana gaioiga na fai a’o sauni ile taaloga.

Ole Aso Sa na tea nei na tuua ai Samoa ele ‘au taitoafitu ale Manu Samoa mo le faamoemoe e ui atu i Niu Sila ona malaga ai lea ile amataga ole vaiaso ile taamilosaga i Amerika ile faaiuga ole vaiaso nei. Na malaga faatasi atu ai ma le susuga ia Falemiga Selesele agai atu i Niu Sila.