O le susuga i le toeaina ia Faamalua Peteru, ma le mamalu o le ekalesia i Henderson i Aukilani i Sisifo, ua faamavae ese mai ma ua lē o toe iai i lalo o le faamalu a le EFKAS, poo le Ekalesia Faapotopotoga Kerisiano Amerika Samoa e pei ona sa galulue ai i tausaga e tele ua tuanai.
O Rev Faamalua ma le ekalesia i Henderson, sa faavae ma amata mai i lalo o le EFKS, Ekalesia Faapotopotoga Kerisiano Samoa.
O nisi o mafuaaga e lē toe fia ta‘ua sa tulai mai i lena vaitaimi, ma sa avea ma pogai o le faamavae ese ma tuua le mafutaga ma le EFKS, ae faatasi atu ma galulue i le EFKAS, poo Tutuila.
O le fonotaga tele a le EFKAS sa usuia i lona laumua i Kanana Fou i le tausaga talu ai, sa faailoa ane ai ua tatau ona malolo penisione le toeaina mai ona tiute ma le galuega faafaifeau, e pei ona sa tauaveina mai le tele o tausaga.
E tusa ai ma iugafono a le EFKAS, o loo aiaia lea faaiuga mo le aufaigaluega, pe a laasia le matua pei ona faatulagaina.
Na talia faaaloalo e le toeaina ma aloaia le faaiuga a le fono tele, peitai e talitonu le toeaina, o lona soifua ofoina mo le Alii, e lei taitai ona mae‘a ma oo i se taimi e faamuta ai.
O lona lea talitonuga e faavae i aoaoga a le Tusi Paia, ma lana tautoga sa faia ma lona Atua mai le amataga o le galuega.
Na faailoa e Rev Faamalua lona finagalo i le fono tele i Tutuila, i lona manatu ma le faamoemoe o le a agai i ai mo le lumanai. Sa amanaia foi e toeaiina, ma ave le faamanuia i le auauna ma lona taumafai i galuega uma mo le lumanai. Sa faafetaia foi ma amanaia e le EFKAS, le galue malosi ma taimi sa auauna ai Faamalua ma le ekalesia i Henderson, a o iai i le mafutaga.
O le toe taliu i fanua i Aukilani o le toeaina, sa ia faailoa ai i lana aulotu le faaaliga a le Atua ia te ia, ma le lumanai o le galuega e lē gata i Henderson, ae mo Aukilani ma Niu Sila atoa.
O le faaaliga sa mulimulitai i ai le toeaina, o le tatau lea ona amata ma faavae se amataga fou mo Niu Sila latou lava ia. E tatau foi ona silasila ma vaai i le tutupu a‘e o alo ma fanau i totonu lava o Niu Sila, ma o le mea moni ua mautu Samoa ma Amerika Samoa i so o se vaega lava o le soifuaga. Peitai o Niu Sila, e leai, ma o le uiga moni lea ua tatau ai ona atiina a‘e se galuega fou mo Niu Sila lava latou.
O le a faigofie ma o le a penefiti ai alo ma fanau e soifua a‘e, ma manatu e nonofo mau pea i Niu Sila ma auauna ai, e aunoa ma le taumafai e aapa ma faatali i faaiuga mai Samoa poo Amerika Samoa foi.
E ui sa iai lava nisi sa auese i le finagalo o le toeaina, peitai sa suluia pea i le malamalama ma le pupula fou o le amataga fou e pei ona taumafai i ai le auauna. O le taimi nei, ua fulisia ma ua ioeina le faamoemoe e pei ona naunau i ai.
Faavae le amataga fou EFOSNS
E lē o toe mamao lava se taimi, ona mae‘a loa lea o le faa-Samoaina o le faavae o le ekalesia fou ma le amataga fou, e pei ona ua filifilia ma ua agai i ai le toeaina ma le mamalu o le ekalesia i Henderson.
O lona uiga o Henderson lea ua amata mea ma ua fofoaina se isi amataga fou mo alo ma fanau ma le toatele o tagata lotu o loo alaala ma papaao i Niu Sila.
O le igoa EFOSNS, poo le Ekalesia Faapotopotoga O Samoa i Niu Sila ua filifilia ma ua mae‘a foi ona uia le tulafono mo faiga masani i le lesitalaina, ma le tusiaina o lona faavae aloaia.
E pei ona ta‘ua, e lē o toe mamao ona faamae‘a loa lea o tulaga uma e pei ona manaomia, ona sosoo ai loa lea ma le faalauiloaina ma le faapaiaina, ona gaoioi loa lea ma aloaia faaletulafono, ma avea o le lotu e pei lava foi o isi ekalesia ma ona faiga masani.
O le EFOSNS, o se fatu ua totōina mo alo ma fanau fai a‘e ma o loo soifua foi i totonu o Niu Sila.
O se faaaliga ma le tofa mamao sa tuu e le Atua i le toeaina ia Rev Faamalua, ina ia tatau ona atiina a‘e Niu Sila, talu ai ua mautu Samoa faapea foi Amerika Samoa, peitai e ao ina silasila toto‘a ma vaai alofa mo alo ma fanau o loo soifua a‘e i Niu Sila.
O le lumanai lea mo i latou lava ia, e lē toe faatauanauina e malaga i Samoa ma galulue mo le atiina a‘e o Samoa ma Amerika Samoa, ae atiina a‘e lava latou mo Niu Sila o loo soifua ma nonofo ai.
O vaega ia o le saunoaga a le toeaina Rev Faamalua Peteru, i se feiloaiga ma le Samoa Times. Saunoa foi le faafeagaiga, ua oo i le taimi ma ua tatau foi ona faataunuu lea faaaliga sa tuu e le Atua i lona loto, semanu o maua le malosi a o mafai foi ona galue.
Malolo Penisione
O le tasi o itu sa ia ta‘ua ina ua afea le malolo litaea poo le penisione o faifeau, talu ai ua oo le matua o tausaga ma lona soifua i le tapulaa faatulagaina e pei ona aiaia e le EFKS ma le EFKAS sa tautua ma auauna ai.
O lona finagalo moni sa faailoa e faapea, e leai se malologa faapenisione i le finagalo o le Atua ma aoaoga a le Tusi Paia. O lona lava talitonuga mai lava i le taimi sa avea ai ma faifeau, o ia o se auauna galue mo le Atua, e leai se taimi e malolo ai, se‘i vaganā ua valaau lona Matai pe gasegase foi ma ua lē toe mafai ona fai se galuega, faato‘ā malolo.
Sa toe fesiligia le toeaina, pe o le ā tonu le vaitaimi sa amata ai lea faiga, o le malolo penisione i totonu o le EFKS.
“Ona talu ai ou te manatua le toeaina o Tavita Leasuasu, sa faifeau i lo matou nuu i Samatau i tausaga ua mavae. O le tamā foi o lo‘u tama le toeaina o Fonoti Efeso ma lo matou aiga, sa faafeagai ma le faifeau, pe sa ta‘ua foi o le aiga lea o Tavita ma Folole i le nuu sa tausi ma valaauina ai i Samatau lava”.
“Sa ou mautinoa lava auā sa ou faalogo ma sa ou vaai foi i ai, o se feagaiga sa tuuoti ma ou te lei faalogo lava foi o ta‘uta‘u ni litaea, ma se malologa faapenisione i faifeau LMS poo le EFKS.
O Tavita foi ma Folole na maliliu lava i totonu o le galuega ma lo la nuu i Samatau, ae ua matutua lava o la soifua, ae lei mananao lava e malolo, pe tuua le galuega ma lona nuu. “O se feagaiga sa tuuoti, ma na faato‘ā tatala lava e le Atua ina ua valaau i ai e ala i le maliu. Sa ou vaai foi i mumugafalo a le matou nuu sa fai ma le aiga o le toeaina o Tavita, ina ua masii mai le aiga ma le afioaga i Sapapalii e toe avatu le toeaina ina ua maliu. O lo‘u tamā lava sa fai upu ma faafeagai ma le afioaga i Sapapalii, sa umi se taimi o fai finauga ona o le moni ma le tāua o le feagaiga tuuoti sa faia.
O le mafuaaga lea sa lē maluelue ai ma lē faigofie foi Samatau ia, e aveese atu le tino maliu o lana faifeau sa tausi ma osi mo tausaga e tele, ae sa lē fia malolo foi lea toeaina iloga o le galuega.“O se vaega ua toe faamanatu mai ai e foliga mai sa leai ni penisione o faifeau talu ona faavae mai le ekalesia”.
Rev Faamalua Peteru
“E moni lelei le fesili, o le malolo penisione i totonu lava o le EFKS, sa faato‘ā faaulufale mai i le vaitaimi o le toeaina o Vavae Toma. O se faiga ou te manatua sa na o le Perepereane sa faamamaluina ma faia le penisione pe a matua le soifua o se auauna”.
“O le EFKS lava latou ia, sa leai talu mai le amataga peitai e pei ona ou ta‘ua, o se tasi o saunoaga a le toeaina o Vavae ina ua faaulufale lea mataupu i le fono tele i Malua, sa ia faapea ai, Ua leva ona lē toe fia faafofoga le Atua ia tatou, ona ua tatou matutua, ua tatau ona fai ni malologa litaea, poo le penisione e pei ona ua iai nei.
“O le ala lea na talia ai ma amata faamamalu mai loa, ma sa tuu tapulaa ai foi tausaga ma le matua i le 65 agai i le fitu sefulu e malolo ai ma tuua le galuega. O loo faaaogāina foi e nisi o auauna pe a penisione, o ni taimi saoloto ia mo i latou, e lē toe popole ai mo le galuega e pei sa galulue ai. “E ui lava i lea, a o lo‘u lava talitonuga, a lē fia auauna lava ma galue le tagata ia, malolo lelei ma tuu le galuega, ae lē faapea o le a aafia atu ai fua ma isi e lē fia malolo, ae o loo tumau pea le fia auauna ma galulue e pei ona ofo ai le soifua ma tauto i le Atua ma lona finagalo.
“O le galuega faifeau, e lē pei o le tele o galuega o le soifuaga nei. E ese mai lava le galuega a le faifeau latou ia, auā e faapitoa lava mo le leoleoina ma le tausia o agaga o tagata o le lotu, ma soo se tasi lava i tuaoi ma soo se mea.
O le valaauina e lē tutusa ma le valaauina o le isi foi auauna. O lau ofo ma lau taulaga, e lē tutusa foi ma isi uso auauna. “E tofu lava le tagata ma le faaaogāina o lona soifua, ma meaalofa ua tuuina i ai e le Atua. O lo‘u la olaga ofoina mo le Atua, ou te naunau lava e faia pea le tautoga ua mae‘a ona ou faailoa i lo‘u Matai, ou te galue pea ma auauna seia oo ina valaau, pe ua fetalai mai ou te malolo i se auala ua finagalo i ai, ae lē o le penisione e pei ona faatulagaina e tagata, o lo‘u lea talitonuga”.
O se taimi e lē o toe mamao, ona faalauiloa faalauaitele lea o le faamoemoe e pei ona alo i ai le toeaina ma le mamalu o le ekalesia i Henderson, auā le amataina ma le faavaeina o le galuega fou mo Niu Sila, le EFOSNS.
