Faamavae Pastor Tavale Mataia mai ona tofiga

Susuga ile faafeagaiga ia Tavale Mataia male faletua ia Alison male fanau
Susuga ile faafeagaiga ia Tavale Mataia male faletua ia Alison male fanau

Ua tau le faailo ile mamalu ole atunuu le tautua ma galuega faaleoleo mamoe ale susuga ile faafeagaiga ia Tavale Mataia ma lona faletua ia Alisa Mataia. Ose auauna ua leva ona galue ma tautua ile fofoaina ma le faafaileleina o agaga o tagata mai Samoa seia oo mai lava i totonu o Aotearoa nei.

Sa ia faavaeina le galuega ole Youth for Christ i Samoa ile tausaga e 1973 seia oo ile 1986 ma e sefulutolu tausaga talu ona laua taitaia lea galuega mo le faafaileleina o agaga o tupulaga talavou ole atunuu.

Na suia le fu‘a o lea galuega ile susuga ia Pastor Viliamu Mafoe ina ua ia lagonaina mai le Atua ua tatau ona pasi le polo ile isi uso a auauna. Na malaga mai i Niu Sila ma faamautu ai le aiga, ma laua faavaeina pe faatuina ai se tasi o Ministry ua faaigoaina ole Pacific Island Needs ile tausaga e 1987 seia oo ile tausaga 1995, ma e sefulu tausaga talu ona laua tauaveina lenei galuega mo manaoga o tagata ile itu faaleagaga poo le galuega faaevagelia.

Na ia lagona foi i lea taimi ua tatau foi ona sui le fu‘a mo le isi uso a auauna e pei ona faaseetuagalu ai loa ae faaauau ele susuga ile faafeagaiga ia Peter Crichton le taitaiina o lea galuega i lena taimi.

Faavaeina le Ekalesia ole Word of Life

Ole 1996 na faavaeina ai ele susuga ile faafeagaiga ia Tavale Mataia ma lona faletua ia Alisa le Ekalesia ole Word of Life, ma ua fā ai nei lala o lea Ekalesia talu ona faatuina. E lua oloo i Ausetalia, i Sini oloo faifeau ai le susuga ile faafeagaiga ia Ula Nanai ma lona faletua, ma le isi tasi i Melepone oloo faifeau ai le susuga ile faafeagaiga ia Jeff Filipaina ma lona faletua.

E 2 aulotu oloo i Niu Sila, e tasi i Otahuhu oloo faifeau ai le susuga ile faafeagaiga ia Tino Tioa ma le faletua, ma le tasi oloo i Henderson oloo galulue ai nei Pastor Tavale Mataia ma lona faletua ia Alisa.

Ua savali nei ile 20 tausaga talu ona faaveaina mai lea foi galuega ma oloo maitauina ai le faatuputupulaia o tagata lolotu oloo auai i ia foi tovine. Ma e foliga mai ua tele ni galuega faaevagelia ua faatuina ma ausia e lenei auauna ale Atua auā lava le faafaileleina ma le fofoaina o agaga o tagata mo le Atua ma lona malo.

Sau se tagata malosi e faaauauina le aveina ole fu‘a

Ua 70 nei tausaga ole susuga ile faafeagaiga ia Tavale Mataia, ma ua ia lagona foi ua tatau ona pasi le polo ise isi tagata malosi na te faaauauina le tauavaeina o ona tiute faafaifeau sinia i totonu ole latou ekalesia aoao.

Ile saunoaga ale susuga ile faafeagaiga e faapea, ole fuata ma lona lou, ole taimi foi ma le mea e tupu ai. Ma ua iai la lona lagona ua tatau ona faaseetuagalu ma ona tofiga ia, ae sau se isi malosi i lea tofiga, ose tagata oloo lava lona malamalama ma lona agavaa ile faatinoina ole galuega i lenei taimi.

Faailoa mai ele faifeau e lei maua la se isi ole Ekalesia aoao e ono faaauauina le momoliina ole fu‘a i ia tofiga ae oloo iloilo pea le ekalesia mo se tasi e ono tulai mai.

Ole faamavae ai ole susuga ile faafeagaiga ia Tavale Mataia ma lona faletua ia Alisa Mataia ma tofiga ole lotu, ua faapena ona faamavae atu ai ma nisi o ana tofiga sa galue ai i nisi o faalapotopotoga e pei ole Tama Tane Malosi lea sa avea ai ma taitaifono, a‘o lea ua see atu lea tofiga ile susuga ile faafeagaiga ia Kuki Aloalii.

O lona tofi failautusi ile mafutaga a faifeau soofaatasi o lea ua faamavae mai ai, ae see atu lea tofiga ile afioga ia Father Michael Alipia Enderman faapea nisi o ona tofiga sa iai i nisi o komiti faafoea ale komiuniti.

Ole faaiuga ole vaiaso ua mavae na usuia ai le fono tele a lea Ekalesia ole Word of Life, ma sa aofia uma ai susuga i faafeagaiga ma o latou faletua faapea sui usufono a ekalesia e fā i lenei koneferenisi.

Ole koneferenisi lea sa fofoga aloaia ai loa ele susuga ile faafeagaiga ia Tavale Mataia ma lona faletua ia Alisa Mataia le la faamavaega mai tofiga ole faifeau sinia i totonu ole ekalesia ae tumau pea le avea o laua ma faifeau i totonu ole ekalesia ole Word of Life i Henderson.

Na faailoa ele susuga ile faafeagaiga i lea fono, oloo tumau pea lo laua malosi ile tino, ae ua tatau ona sui le fu‘a, ina ia faaauau ai pea le manuia ole galuega ale Atua mo le lumanai. Ma ole fonotaga lea na faamanatuina ai foi ele ekalesia le atoaga ole 70 tausaga ole faifeau.

Ile faamavae mai ai ole faifeau ma ona tofiga nei ae ua avea nei laua ose faatamā ma se faatina i totonu ole Ekalesia aoao e faamatua iai le galuega ale Word of Life.

O Pastor Tavale Mataia e mai le afioaga o Satoalepai i Savaii ae ole faletua ia Alisa e mai Napier i Niu Sila. E toafā o laua alo ma oloo galulue uma lava i totonu ole ekalesia, e 12 fanau ale la fanau.

O lona atalii matua ia Steven oloo avea nei ma faifeau mo tupulaga talavou ma ua sefulu ai nei tausaga o galue ai i lea tofiga. Ua 43 tausaga talu ona galulue fulltime lenei ulugalii ile galuega ale Atua, e pei ona avea ai ma faatonu ole YFC i Samoa ile 13 tausaga, 10 tausaga o avea ma faatonu ole Pacific Island Needs ma le 20 tausaga o avea ma taitaifono ole Ekalesia aoao ole Word of Life i Niu Sila ma Ausetalia.