Ua saini e Lima Sopoaga le konekarate e taalo ile kalapu a Wasps i Egelani. Ole a mae’a ai le taimi o Sopoaga ile All Blacks ma le Otago Highlanders. E lua tausaga ole a taalo ai Lima ile ‘au a Wasps, ae e amata ile faaiuga ole 2018 pe a mae’a taaloga ale Super Rugby ma le All Blacks. Ole aafiaga o Sopoaga ile konekarate ua ia sainia nei ole a taofia ai lona avanoa e taalo ai o ia ile Rugby World Cup i Iapani ile tausaga fou.
Na ta’ua e Sopoaga le faigata ona fai o lana faaiuga. E lē ose filifiliga faigofie na feagai ma ia ma lona aiga, aemaise ai le tuua o aiga ma ana uo na o latou taaalo ile All Blacks, Southland ma Otago Highlanders ae malaga atu e taalo i atunuu i fafo. Na faailoa foi e Tupuivao Steve Hansen le faiaoga ale All Blacks lona faanoanoa ile tuua e Lima ole ‘au. E ui i lea, na ta’ua e Hansen, e malamalama lelei ile faaiuga ma le filifiliga a lana #10. Na ia ta’ua foi lona lagolagoina o Sopoaga i lea filifiliga mo lona lumanai.
Pau le faiaoga ole a lē fiafia ile faaiuga a Sopoaga o Aaron Mauger le faiaoga fou ale Highlanders. Ae e avanoa Sopoaga mo le Highlaners ile 2018, e fesoasoani lea ile atinaeina o nisi taleni mo le Highlanders ile 2019. Ole alu ese ai o Sopoaga ole faailoga lea ua ia lagona ua mae’a lona taimi i totonu ole All Blacks. E mafua lea ile laiti o taaloga faavaomalo ua taalo ai Sopoaga. Talu mai le 2015 lea na muai taalo ai mo le ‘au ile taaloga ma Aferika i Saute i Johannesburg (Sept 2015), e na’o le 16 taaloga faavaomalo ua taalo ai Sopoaga. Ae ole tele o taaloga na faaleoleo ia Beauden Barrett ma Aaron Cruden.
E ui ua alu ese Cruden le isi #10 ale All Blacks e taalo i Farani ae ua iai le isi poloka ile auala o Sopoaga e maua ai nisi ana taaloga, ona o Damian McKenzie le fulupeki a NZ ile 2017.
Ole faaletonu mo Sopoaga ole mafai lea ona fesuiai tulaga e taalo ai McKenzie. E mafai e McKenzie ona taalo ile tulaga #10 a Sopoaga e sui ia Barrett. E ui na’o le tasi le tausaga o McKenzie ile ‘au ae ua 12 ana taaloga faavaomalo. I taaloga faaiu ole 2017 na muamua McKenzie e sui ia Barrett ile #10 nai lo Sopoaga. Ole tulaga lea ole a taalo ai McKenzie ile Super Rugby mo le Chiefs ile 2008 aemaise ai le alu ese o Cruden mai le Chiefs.
E tele le avanoa na tuuina e Steve Hansen le faiaoga ale All Blacks ia Sopoaga e faamautu ai sona avanoa mo le ‘au. Peitai e iai lava tulaga masani faalakapi na pa’ū ia Sopoaga i taaloga faavaomalo. Aemaise ai le toe foi mai o Israel Dagg ma Ben Smith ile All Blacks ile 2018 ole a faateteleina ai le faaletonu mo Sopoaga.
Ole a see ai Damian McKenzie e taalo ile #10 ale All Blacks auā ole a taalo Smith ma Dagg ile tulaga fulupeki na fai mo McKenzie ile 2017.
