O le vaiaso na tea nei na saunoa ai le afioga Le Mamea Ropati Mualia i lana saunoaga faaminisita i totonu o le Palemene o Samoa, o le maota o loo vetei ai upu a le atunuu auā se manuia o ona tagata.
I lea saunoaga sa mamao ma manatu o le Palemene atoa aemaise ai o le toatele o Samoa i ona tagatānuu faapea le itumalo sa pele i le soifua tautua o le afioga Le Mamea Ropati, le itumalo sa fai ai o ia ma o latou fofoga i totonu o le Palemene i le tele o tausaga, le itumalo o Lefaga ma Faleaseela.
Na leai so latou manatu o le a faaiu le saunoaga a le latou lupe faalele i upufai o Malo i lona faafetaia lea o le latou lagolago, aemaise o le momoli mai o lana faamavaega aloaia ona ua iai lona manatu ua sau le taimi ua tatau ona malolo mai ai i le Tofi o le itumalo, ae se‘i fili le tofa ma saili se isi e tulai mai e avea ma a latou faipule fou.
Na logo faatutuila tulimanu uma o Samoa a o saunoa le afioga i le Minisita ma momoli mai lana faamavaega, ma o se saunoaga faanoanoa i le toatele. E mafua ona faanoanoa ona o se tasi sa tulai mai o se faipule aogā i totonu o le nuu ma le itumalo, aemaise ai o lana tautua ia Samoa i le tele o tausaga.
O le 1979 sa uluai ulufale atu ai le afioga Le Mamea Ropati Mualia i le Palemene o Samoa, ma o ia foi o se tasi o sui faavae o le Vaega Faaupufai a le HRPP ina ua faavae mai lea Pati i lalo o le taitaiga a le afioga i le Tootooalii, le Afioga Tofilau Eti Alesana.
O se auauna sa tele ni ona sao i Matagaluega sa tulai ma avea ai o ia ma Minisita, e amata mai lava i lona uluai ofi atu i le Palemene seia oo mai lava i le taimi nei. O se tasi o sui finau ma e maeu lona lototele.
E lē o se tagata e sii lona leo auā e agamalu ma lotomaulalo, peitai e iloa i lana finau lona loto ina ia faia mea silisili e manuia ai lona itumalo ma ona tagata. O se taitai e lē femoumouai, ae faalagolago i le tofa ana faaiuga fai.
Na tautua o ia i le taimi a o tasi le Palemene seia oo lava i le taimi na vaeluaina ai ma o ese mai ai ma le afioga Tofilau ma Vaai Kolone ma faatuina le HRPP, mulimuli ane ona toe foi lea i le SNDP e tautua ai a o avea le afioga Tupua Tamasese Efi ma taitai a lea vaega.
Sa iu ina faaseetuagalu le afioga Tupua Tamasese Efi mai le Palemene ona suia lea o le igoa o le SNDP i le SDUP lea foi sa avea ai Le Mamea Ropati ma taitai ina ua tuumalo le afioga Asiata Saleimoa.
O le palota o le 2010 lea sa toe tauva mai ai le afioga Le Mamea Ropati i lalo o le fu‘a o le HRPP ina ua faalauiloa mai le finagalo a lona itumalo ina toe avea o ia ma sui tauva a le HRPP, ma o le toe tulai mai o le HRPP ina ua manumalo mai i le palota tele o le 2010, na filifilia ai loa le afioga Le Mamea Ropati e avea ma Minisita o Faatoaga ma Faigafaiva e oo mai i le taimi nei o loo ia umia pea nei tofiga tetele.
E tele atunuu o le lalolagi sa avea ai le afioga Le Mamea Ropati Mualia ma sui o Samoa i ana fonotaga faavaomalo, a o avea ma minisita i le tausaga 1982 a o avea ai o ia ma Minisita o Aoga, e oo mai lava i le taimi nei lea ua toe filifilia ai o ia e avea ma Minisita o Faatoaga ma Faigafaiva. O ia malaga sa avea ai o ia ma fofoga o Samoa, sa lei faapaole le faatinoina o ona tiute. Sa iloa ona matuā faatuatuaina o ia i le tele o nofoaiga i le faigamalo a le HRPP a o avea ai Tofilau ma Palemia o le Malo Samoa.
O lona amanaia ma le tele o lona tomai ma ona agavaa lea foi sa toe filifili ai o ia e avea ma Minisita ina ua toe manumalo mai i le faigapalota tele a le atunuu i le 2010.
A o lei avea le afioga Le Mamea Ropati ma faipule, sa galue o ia i le faletalavai a le atunuu i totonu o le falemai tele i Motootua. O ina na amata mai ai lona sao tautua ia Samoa ma ona tagata, seia oo lava i le taimi na ia manatu ai ina ia faatuina si ana ia lava pisinisi o le faletalavai ma o ina na ia tuua ai loa lana galuega i Motootua ae amata mai lana faletalavai, e oo mai lava i le taimi nei o loo iai pea lea auaunaga i totonu o le fatu o le taulaga o Apia.
I nisi o tusitusiga sa tuuina mai i luga o upega tafailagi sa faaalia ai e lona atalii le amataga mai o le soifua talavou o lona tamā, le afioga Le Mamea Ropati. Sa amata mai lava i se soifuaga pumoomoo ma tauatiae. O le tele o ana galuega sa fai o le fesoasoani lea i si ona tina i le faatauina o panikeke.
Talu mai lena soifuaga tauatiae, sa tatalaina ai e le Atua nisi o faitotoa e ala i aoaoga, ma o avanoa ia sa faalauteleina ai le malamalama ma faamanuiaina ai i nisi o aoga i fafo atu ma Samoa, mulimuli ane ona toe taliu lea i Samoa ma faaaogā ai le tomai aoaoina e pei ona faigaluega ai i Motootua ma faavae mai ai lana ia lava faletalavai.
E seāseā lava maua ni tagata e pei o le afioga Le Mamea Ropati pe a fua atu i le talafaasolopito o le Palemene o Samoa. O le tele o faipule faatoa tuua lava le Palemene ina ua valaau i ai le Atua, a lē o lena foi, ua mafua ona tuua le Palemene ina ua faia‘ina ma fiu e toe tauva mai ua lē toe filifilia lava e avea ma sui faipule mai ia latou itumalo.
Peitai ane o le faamavaega a le afioga Le Mamea Ropati, o se faataitaiga lelei tele lea i soo se faipule pe a oo ina faalagolago lona soifua galue i le taitaiga a le Agaga Paia a lo tatou Atua.
I lana saunoaga faamavae na ia ta‘ua ai, na ia ofi mai i le Palemene a o talavou lona soifua, peitai o lea ua sinā lona 
lauao o loo tautua lava.
Na ia ta‘ua foi se tasi o mau mai le Tusi Paia, o le vaitau ma mea e tutupu ai. O lona uiga e iai lava le vaitau o mea uma lava sa faia e le Atua. O le faamavae mai o le afioga Le Mamea Ropati, o le faailoga lea o le a‘e ma le manumalo o ona faiva sa tautua ai ia Samoa.
Sa tautua ma le faamaoni i le Palemene ma le itumalo, sa lei faapaole lana auaunaga ia Samoa ma ona tagata, lea lava ua faamavae mai o loo tumalele pea lenei tautua e lē fesiligiaina.
E lē taumate o le a matuā misia lenei tofa i upufai a le Palemene auā o le tofa sa tele ina malu ai felafolafoaiga a le maota. O lana tuualalo sa tele ina to‘a ai le tai pe a oo ina sousou galu o finagalo faaalia ma manatu fefinaua‘i, aemaise lava le taimi e faatalanoaina ai ni mataupu ‘anoa i totonu o le Maota Fono a Samoa.
Soifua Faaupufai o Le Mamea Ropati Mualia
1979 – Ulufale i le Palemene
1982 – Minisita o Eleele ma Fuagafanua; Minisita o Falemeli ma Faasalalauga; Minisita o Aoga, Autalavou, Taaloga & Aganuu ma Leipa
2006 – Taitai SDUP
201 0 – Minisita o Faatoaga ma Faigafaiva
