Ua lē o toe po se lilo i le mamalu o le atunuu i le faailoa ai o le faamavaega a le sui faipule o Palauli Falefa mai le tofi Minisita o le kapeneta e pei ona sa avea ai ma minisita o le Matagaluega o Tupe a le Malo.
O le feiloaiga a le Afioga Faumuina ma tusitala i lona aso mulimuli i le ofisa sa galue ai i le maota fou o le NPF i Savalalo, sa ia faailoa ai nisi o ana fuafuaga pe afai e talafeagai ma sona valaauina. O lea tamalii sa tele tausaga sa galue ai i totonu o Malo Aufaatasi ma auauna ai i nisi o atunuu o Malo Arapi. O lona tuua o lea galuega na taliu ai i Samoa ma tauva i le faigapalota o le tausaga e 2001 ma filifilia ai i le tofi faipule o le itumalo o Palauli le Falefa, e aofia ai afioaga o Sili, o Papa, Gautavai ma Gataivai.
Faaalia e Faumauina o lona faasee tuagalu ma le tofi minisita ua faaaogā ai lona taimi e faatino ai nisi o fuafuaga i lona aiga aemaise o lona itumalo i le auai i fono ma isi lava mau atinae. Peitai ina ua fesiligia i lana tautua sa galue ai i totonu o Malo Aufaatasi, e lei faafitia e Faumuina lona toe fia maua o se avanoa e tautua ai i lea faalapotopotoga tele a le lalolagi pe afai o le a valaauina.
O le taimi o avea ma minisita o le kapeneta sa maua ai e le faipule o Palauli le Falefa se manaoga mai le faalapotopotoga mo lana tautua. O le totogi o lea tautua na faaalia e Faumuina e matuā maualuga atu ma telē nai lo le totogi o le minisita e uma ona toe sasaa i manaoga o tagata o lona itumalo e afea sana fesoasoani.
Ua tolu paeaiga sosoo ta‘i lima tausaga a le Palemene o filifilia pea o ia e lona itumalo, ma o le faatolu ai foi lea ona tofia pea i le tofi minisita. Na muai avea ma Minisita o Galuega a le Malo, ma o le taimi lea o fuafuaga a le Malo o le a faata‘ape ai lea matagaluega tele ae tuu atu le faia o galuega tetele e pei auala ma isi i konekarate tuma‘oti e pei ona iai i le taimi nei. E lei faigofie lea galuega na ia tauaveina ona o le taimi lea e silia i le fāselau le aufaigaluega a le matagaluega o galuega a le Malo, peitai sa manuia ana fuafuaga ma tino mai ai lea manaoga o le Malo.
O lana tautua foi lea na faaalia e le Palemia i le Palemene ina ua mae‘a ona ia talia le faamavaega, na faasaoina ai le $20miliona sa goto a le Malo i lea matagaluega i tausaga uma. O le paeaiga o le tausaga e 2006 i le 2011 na avea ai ma minisita o le Matagaluega o le Siosiomaga lea ua faaigoa nei o le Matagaluega o Puna‘oa Faalenatura ma le Siosiomaga.
Sa folasia e Faumuina i lana saunoaga faaminisita i le Palemene nisi o galuega na ausia i lona taimi atoa i lea matagaluega e pei o le fausia o maketi i Savaii, o Vaitele ma le toe faaleleia o le maketi i Savalo lea ua avea nei ma fili maketi. O lona taimi foi na faia ai fuafuaga e tuu i lalo le maketi i Fugalei ae toe fausia. O le paeaiga o le 2011 na filifilia ai e avea ma Minisita o Tupe lea ua faamavae ai ua mae‘a le tolu tausaga o le paeaiga o iai nei.
