“O lea ua filifilia se isi tamaitai Samoa nate tauave le tofiga”..Sosaiete kanesa
O le faletua o le alii Hai Komesina o Niu Sila mo Samoa o Christine Hurley, o se tasi o sui faavae o le sosaiete o le gasegase o le kanesa i Samoa i lona faavaeina.
O se tina e naunau tele e faamaopoopo galuega lelei uma mo le faalauiloaina ile atunuu o le matautia o le gasegase ina ia mataala iai. I le faatuina o le sosaiete sa avea le faletua ma Ofisa sili, sa lagolago iai nisi o sui o le sosaiete.
O le faaiuga o le masina nei o Ianuari e toe tuua ai Samoa e le alii Hai Komesina o Nick Hurley ma lona faletua ina ua maea le taimi galue o le alii Hai Komesina i Samoa.
O le mafuaaga foi lea ua faamavae ai lona faletua ma le tofiga sa ia umia, peitai e le faigofie ona faamavae le faletua ma le sosaiete sa ia lotolotoi ai faatasi ma isi sui ile faatuina.
I se pepa o faamatalaga mai le sosaiete na faaalia ai e lo latou Pelesetene le susuga Leiataualesa Darryl Clarke, e tele le sao taua o Christine ua faia mo le sosaiete talu ona faavae mai. E le gata o galuega faalauiloa ile matautia o le gasegase o le kanesa ae o lona sao ile sailia oni fesoasoani tau tupe mo galuega a le sosaiete.
Ua sui tulaga ile faletua se tasi o tamaitai o le atunuu o La-Toya Lee sa galue ile Matagaluega o le soifua maloloina o se tasi sa feagai ma le saunia o faiga faavae a le matagaluega, faapea foi ma le tauaveina o galuega tau fesootaiga ae iai foi ona tomai ile itu tau ile siosiomaga poo le environment.
Ua faaalia e le faletua o Christine ua fetaui ma talafeagai lelei tomai o loo umia e La-Toya ma manaoga o le sosaiete ile faatinoga o ana galuega.
“E lagona le faanoanoa ile tuua e le faletua o le galuega ona o ia lava sa faamoemoeina ile tofiga sa ia umia”, o le saunoaga lea a le pelesetene.
Peitai o le tuua e le faletua o le sosaiete ae ulufale atu se isi tamaitai e faaauauina le galuega o se fiafiaga lea ile pelesetene ona o le sosoo o le fau ma le fau.
Lona uiga o itu lelei uma sa tauave e le faletua o le Hai Komesina o le a faatinoina foi e le tamaitai o La-Toya.
E pei ona silafia o se tasi o suegatupe tele a le sosaiete ile tausaga ua mavae na lagolagoina e le palemia lea na faafuga ai lona ao ma sele mole, ae lafo tupe ai tagata na lagolagoina.
O nisi foi o le atunuu sa latou ofo atu e sele mole o latou lauao e aofia ai ma ni tamaitai, lea na maua ai e le sosaiete se vaegatupe e silia ile valu sefulu afe tala.
