Le afioga Afamasaga Michael Soonalole ole a tuua ona tiute faaleoleo ma lona tulaga ose Komesina lagolago ile faaiuga ole vaiaso nei

Le afioga Afamasaga Michael Soonalole ole a tuua ona tiute faaleoleo ma lona tulaga ose Komesina lagolago ile faaiuga ole vaiaso nei

Ole faaiuga ole vaiaso lenei e tuua ai ele afioga Afamasaga Michael Soonalole le galuega faaleoleo ma lona tofiga Komesina lagolago ina ua faamavae faamalosi ise fautuaga mai le Minisita ole matagaluega.

Ole faaiuga lenei e mafua mai ise mataupu na tuua‘ia ai le afioga ile Komesina lagolago a‘o ia tauave tofi ole Sui Komesina ile tausaga ua mavae. E tele faamatalaga ole tuua‘iga ae ua faaalia e ni molimau faatuatuaina, ose fiafia e faauma ai se aoaoga a tamaitai leoleo na valaaulia ai le Komesina lagolago i lona tulaga ole sui Komesina. Ole mafutaga sa faia ile nofoaga ole Tofa Mamao i Leauvaa ma na faia ai se fiafia poo se pati e faauma ai.

Ole po ole fiafia na aliali ai se gaioiga na aafia ai le Komesina lagolago ma tuua‘ia ai i lana amio ua soli ai aiaiga ma taiala o lana galuega. Ole tamaitai leoleo e faapea na faia iai le gaioiga e lei faauluina sana tagi ae na oo ile ofisa ole Toomaga mo ē Puapuagatia ma faailoa iai ona mafatiaga mai le vaaiga a isi tamaitai leoleo, ona ua pisa ai faamatalaga i totonu ole ofisa o leoleo i Apia.

Na oo le mataupu ile Minisita o Leoleo a‘o seei ai le afioga Sala Fata Pinati. Na oo foi ile Palemia le mataupu ma fautuaina ai le Minisita i lea taimi e faia sana faaiuga. Mai lena taimi e oo mai ina ua suia le Minisita o Leoleo ile Palemia, sa maua ni molimau na ta‘ua ai ua ave le fautuaga ile Komesina lagolago e faamavae loa ma tuua le galuega.

Ole Aso Gafua ua mavae na faaalia ese molimau faatuatuaina mai le ofisa autu o leoleo, na fono ai le pulega ma faailoa ai ele afioga Afamasaga Michael, ole aso 10 o Mati 2017 ole a ia tuua ai loa le Matagaluega o Leoleo.

Na maua le afioga ile Komesina lagolago ise feau na lafo iai i luga o fesootaiga televavave poo le social media le facebook. O lana tali mai e faatali se‘i maua se tali o lana tusi faamavae. Peitai e aumai le tali lea ua maua i sailiiliga, ua talia le faamavaega ua faia faamalosi ona o tuua‘iga na aafia ai le Komesina lagolago.

O lea ua totoe ai nei na‘o Komesina lagolago e toatolu pe a tuua e Afamasaga le galuega ile faaiuga ole vaiaso nei. Ole tasi ole toatolu lea oloo faamalolo lē tumau le afioga Samoa Mulinuu Mulinuu. Ua na‘o le afioga Fauono Talalelei Tapu ma Leiataua Fata Aviga Salale ole a galulue e faaauau nei tofiga.

Ole tausaga e 2019 e mae‘a ai Konekarate tai tolu tausaga ma ole mutaaga foi lea o ia tofiga auā ua iai se faaiuga ale Kapeneta e lē toe iai ni tulaga o Komesina lagolago ae ole a toe foi ile tulaga sa iai muamua, ua na‘o le Komesina ma le Sui Komesina o Leoleo.

Comments

comments