Na faatumulia le Malumalu o Peteli Fou i Cabramatta poo le Maluapapa a le EFKS i Fairfield i le Aso Toonai, 1/8/2015 auā le faamavaega aloaia a Pulega ma le Matagaluega a Niu Sa Uelese mo le faifeau malolo manumalo le afioga i le Toeaina Faatonu ia Rev Peleti Toese Toailoa ma le faletua ia Senetenari.
O se aso o le faanoanoa ma le loimata maligi auā o lenei ua motusia le mafutaga talu ona amata mai le la auaunaga mo le tau asuina o le ipuvai o le ola i totonu o lenei ekalesia mai le 1984.
E lē o se aso faigofie foi auā o le susuga Peleti Toese Toailoa ma le tina o le galuega ua loa ma silafia lelei lo la sao e lē gata i le EFKS ae faapea foi mo isi Ekalesia ma a latou faamoemoe faapea le mamalu lautele ma faigamalaga mai Samoa e aofia ai le Sui o le Malo.
O le polokalame o lenei faamavaega na amatalia i se sauniga faamavae na taitaia lava e le Afioga i le Toeaina Faatonu Manumalo i le malumalu lava ua tolusefulu tausaga talu ona ia ositaulaga ai.
Na sosoo ai ma le sauniga i le Hall i tuamaota o le malumalu na masii atu ai pulega e fā e molimoli la latou faafetai ma le faalaeiau i se tasi o toe Ulutaia ua loa lona soifua i le galuega ma ona tofiga taualoa. Na lē ofi totonu o le Hall a le ‘Maluapapa’ i Ekalesia uma o Sini ma o latou faafegaiaga ma faletua i lenei aso taupoina.
O le susuga i le Faafeagaiga ia Rev Isaako Patea na avea ma fofoga o le aso ma faasoasoaina le polokalame felanulanuai i siva ma pesepesega a pulega e fā a Sisifo, Sasa‘e, Saute ma Matu. E lē gata i pese ma viiga aemaise siva matagofie sa faamavae ai Pulega taitasi sa molimolitai ai foi ma a latou meaalofa e tautoalua ma a latou faafetai mo le galuega ola ua aeae ai nei Niu Sa Uelese.
Sa tauaao ai foi se meaalofa iloga a le mafutaga a Tina o le matagaluega aemaise faifeau ma aoao auā lava pelega o le galuega a le afioga i le Toeaina malolo manumalo ma le tina o le galuega.
O le faletua o le Toeaina Faatonu fou ia Rev Taipo Malifa le tina ia Sitaua Malifa na saunoa e faaleo ma faafetaia le timaiga ma le faufautua a le susuga ia Rev Peleti Toese Toailoa mai le amataga faapea le tina ia Senetenari.
Sa saunoa foi le tiakono Toeaina o le EFKS Fairfield ia Loli Fauena e agatonuina le faaaloalo maualuga ma le agalelei o susuga i Faifeau ma faletua aemaise le maave eseese o fata faitaulaga e fia ma lo latou aao mafola ma le tagai i le talalelei.
Na taualuga le aso i se saunoaga faamavae matagofie a le Susuga ia Rev Peleti Toese Toailoa aemaise le tina o le galuega e toe faamanatu ai luitau sa feagai ai mai le taunuu mai i le 1984 ma tau amata le faatinoina o le galuega a le Atua. Sa faigata le tauasaina o le gasū o le taeao ae peitai sa lē faavaivai ai le faatuatua.
O se saunoaga a Rev Peleti Toese Toailoa i lea aso na toe faamanatu ai le taitaiga a le agaga paia sa tauaveina mai ai nisi o fita i taimi ua sola ae sa tali mai lava le Atua i faamanuiaga. O se tasi o faamanatu e manatua ai pea o le fausia lea o le malumalu tapuai ‘Peteli Fou’ ua iai nei.
O le afioga i le Faatonu ua tulai mai nei Toeaina ia Rev Taipo Malifa sa taualugaina le aso i lana lauga faafetai mo le tamā ma le tina malolo manumalo i le tele o galuega lelei ma le tāua sa faia i totonu o le tolusefulu tausaga i Sini nei.
O lea lava foi lagona faafetai tele sa autasi ai Susuga i Toeaiina o Pulega e pei o Rev Simeona Taefu ma le faletua ia Alofa Taefu, Rev Siaki Brown ma le faletua ia Gaufa Brown, Rev Kolia Kolia ma le faletua ia Sootuli.
O le Aso Sa 30 o Aukuso le sauniga Lotu faamavae o le a lauga ai Rev Elder Peleti Toese Toailoa i lana Ekalesia peleina i Fairfield.
