Ua faailoa nei e le Komiti Faafoe a le Samoa Day 2016 aso ua atofa mo tapenaga mo lenei tausaga lea sa galulue ai le Fono Aoao a Tagata Samoa i Sini.
O le Aso Faraile 10 Iuni 2016 e tatala ai i se tatalo ma se faamanuiaga le Siva aloaia poo le Independence Ball e faia lea i le Roma Function Centre i Liverpool. O le po foi lenei e valaaulia ai sui o le Malo NSW ma faipule o itumalo o loo galulue mo tagata Samoa i Niu Sa Uelese nei.
E lē gata i lea o le auai ai o sui o le Ekalesia ma le Afioga i le Komesina o Samoa i Canberra ia Hinauri Petana faapea le afioga i le Konesula o Samoa i Sini ia Fonoti Manogiamanu Etuale Ioane ma le faletua.
O se po foi e faalauiloa atili ai Samoa i valaaulia faatoa auai atu mo lenei faamoemoe.
O le Aso Sa e sosoo ai, 12 Iuni ua tapena i ai mo le sauniga lotu o le tutoatasi e faia i le Malumalu o le Ekalesia Asofitu Tutoatasi i Minto lea o le a taitaia e le Fono a Ekalesia Samoa i Sini nei o loo avea ai le afioga a le Sea ia Rev Savaii Loto ma taitaifono.
O le siitia atu i le pitonuu o Minto auā e pau lea o le malumalu tele e gafatia le aofai o tatou tagata i Sini nei. O le Aso Gafua e sosoo ai 13 Iuni o le a faatasi ai le atunuu mo le Samoa Day i le Whitlam Centre i Liverpool mai le taeao seia oo i le afiafi mo faafiafiaga ma faleaiga aemaise le faalauiloaina ma faatinoina o faiva o Samoa e pei o le tatau, umu, lalagaina o meataulima ma ato aemaise nisi o faamoemoe ua polokalameina.
O le Aso Lua 10 Me 2016 le vaiaso nei lea e valaaulia ai foi le atunuu e afifio atu e faafofoga ma maua auala e fesoasoani mai ai le Malo ma matagaluega i soo se mataupu o loo fia maua ai se fesoasoani e ala i lana ‘Awareness Day’ Faailoa e sui o le Komiti Awareness Day afioga Tuioti Ruta Tonumaipe‘a ma le faletua ia Minerva Patu, o alo ma fanau a Samoa o loo galulue i nei matagaluega o le a faasoaina mai i lea aso nei avanoa mo tatou tagata e faia lea i le itula 10 i le taeao e agai atu i le sefulua i le aoauli i le malumalu o le Perepereane i Lakemba o loo galulue ai le susuga Rev Faauuga Siitia ma le faletua ia Faatuai.
Ae mo polokalame o le aso 13 o Iuni o loo fuafua foi se savali mo le taimi muamua e lesitara ai soo se aulotu, ausiva, aoga ma aufaigaluega ma soo se faalapotopotoga e fia auai e aunoa ma se totogi e auai ai.
O lea solo e tini atu i le Hall autu e amata ai taualumaga o le aso. Ua faailoa mai ua faaiitiitia foi tau o faleaiga mo lea aso i le na o le $300 i le faleaiga ma le tiposi e $200 nai lo le $800 na iai. Ua fautuaina foi e le komiti le mamalu o le atunuu e vave faafesootai mai le numera 0406117912 pe a fia auai i soo vaega o nei aso fiafia e tolu.
