O le taumafaiga a le Malo ina ia siitia le tomai ma faailoga o faiaoga o le mataupu o le Science na ofo ai lava i le amataga o le tausaga ni avanoa sikolasipi o le a totogi e le Malo mo faiaoga o loo aoao atu lenei mataupu ae e lei ausia ni tikeri o lenei mataupu.
O vaega uma nei na talanoaina i feutagaiga o le faaleleia o le tautua faafaiaoga i totonu o Samoa aemaise o le taumafaiga ina ia siitia totogi o faiaoga.
O mataupu nei e lua ua lagalagā soo le pa‘ū maualalo o faaiuga o suega a le fanau i le faasolo mai ai o tausaga taitasi, ma na ta‘ua e le Alii Ofisa Sili o le Matagaluega o Aoga, Taaloga ma Aganuu, Matafeo Falanaipupu Tanielu Aiafi, o le tele o asiasiga ua vaaia ai o i latou ia ua tele ina tuu i ai le galuega o le aoao o le fanau, e lē o iai se tomai aloaia e aoao ai le faasaienisi.
Ua iai le suiga i aoga maualuluga i le atunuu i le aoaoina o le faasaienisi, ona o le toaitiiti o i latou ua maua faailoga e aoaoina lenei mataupu ma ua faatutu ai i se aoga maualuga i se itumalo e aoaoga ai mo lea mataupu i le vasega 12 ma le vasega 13.
O lona uiga o ai lava le tama ma le teine o le maualuga lea e manao e faaauau le faasaienisi e tatau ona aoga i aoga ia ua faamautu ai aoaoga nei, ma o se faiga ua faigata tele i fanau pe afai e mamao ese le aoga lea e faamautu ai aoaoga nei.
O le faiga la lea ua ofo atu ai avanoa sikolasipi e 60 mo faiaoga ina ia maua le tikeri o le faasaienisi (Bachelor of Science).
O le Alii Palemia na saunoa i le tāua o lenei taumafaiga a le Malo ma ia faafetaia le fesoasoani a le Iunivesite o le Pasefika i Saute auā le faagasolo ai o aoaoga nei.
O le vaiaso la lenei e amata ai aoaoga mo faiaoga nei. O le fautuaga a le Alii Palemia i le to‘a 60 ia ua filifilia e amata ai lenei polokalame, ia alolofa ma faaaogā lelei avanoa ua avatu ma totogi e le Malo auā o se laasaga tele lenei ua agai i ai le Matagaluega o Aoga i le faaleleia o aoga i totonu o le atunuu.
