Faamautu le umia pea e Samoa o eleele faaleaganuu

Ua toe faalogoina lagona faaalia o le popole ma le atuatuvale ona o manaoga ua folasia o se kamupani mai Saina i le fia lisiina o ni eleele faaleaganuu mo le 160 tausaga e faagaioi ai a latou pisinisi.
Fai mai le taitai o le Itu Agai ina ua fesiligia e tusitala i sona finagalo, o se pulegamalo lē mataala ma leai se vaai mamao i le lumanai o ona tagata, pe ana talia se manao faapea o se kamupani poo se faipisinisi mai fafo.
Ua iai nei le tulafono e mafai ona lisiina ai eleele faaleaganuu poo customary lands mo le faia o ni pisinisi tetele mai fafo i lalo o ni aiaiga na pasia e le Palemene.
O le mafuaaga foi lea na teuteu ai le faavae ma tuuina atu le aiā i le matai o loo tausia le aiga e faia se osiga feagaiga ma se pisinisi mai fafo i le lisiina atu o se eleele, ae e lē o aveesea ai le aiā a suli e faasino i ai se eleele faaleaganuu o le a lisi.
E lē o iai foi se faaupuga e avanoa ai ona mamulu atu se eleele faaleaganuu i le faatau ma umia e se tagata faipisinisi mai fafo. Ua faaalia e le afioga i le Sui Palemia le tofa Fonotoe Nuafesili Pierre Lauofo, e matuā manino le faavae o Samoa i lea itu. O lona finagalo e lē mafai ona tupu se mea faapea i eleele faaleaganuu.
O atugaluga foi ma popolega o nisi i le aumai o tagata mai fafo ma faia pisinisi i Samoa aemaise le vaaia o tagata Asia o loo galulue i le faiga o pisinisi i Samoa, ua faaalia e le Sui Palemia o loo iai tulafono ma o latou aiaiga e faasino i le faafaigaluegaina o ni tagata mai fafo ma o ia aiaiga ua faailoa ai i tagata mai fafo e maua ni galuega i Samoa pe faatutū foi ni pisinisi i le tulaga e oo i ai, pe a latou lē usitaia tulafono a le Malo o Samoa. O le toe faamaninoina o lea vaega e mafua mai i se kamupani mai Saina ua ave so latou manao i le Malo e aumai i Samoa le 30 afe o tagata Saina e faigaluega ai pe a faatino a latou pisinisi.
O le fuafuaga  le Malo e lisi atu eleele o loo pulea faleaganuu e matai ma suli o aiga Samoa, ona o le tele o nei eleele lea e tusa ma le 80 pasene o fanua i Samoa o eleele faaleaganuu e lē o faato‘aina i ni faatoaga pe nofoia foi e ni tagata.
O le maualuga lava o tausaga o loo tele ina lisi atu ai nei eleele e nisi o pisinisi ua faatutūina i le atunuu o le 60 tausaga, ma le aiaiga e mafai ona toe faafou se lisi. O le a faalogoina i lenei vaiaso i le Palemene ni finagalo o faipule e faasino lava i lenei mataupu.