O le Isaraelu moni e susue pea lona faamalama ma taulai lana silasila i ona laufanua ma ona tagata; o le agaga foi lea ua faaosofia ai finagalo o tamalii ua seei mai i le laulau a le Toomaga mo ē Puapuagatia i le aai o Melepone.
O le anavatau ma le silasila mamao a tamalii nei, ina ia amata faatino ni galuega fesoasoani mo le ofisa autu i Samoa, ona e pei ona silafia o le tagiilima lava le igoa o si tamaitai i le auaunaga iloga o loo faia mo ē puapuagatia i si o tatou atunuu.
Ua faitau masina talu ona sasaa le fafao ma fefulisai faalaau mamafa finagalo ma tau saili se tofa faale-Atua e lima taitaina ai le galuega o le a amata faatino.
O le Aso Tofi aso luasefulu ma le tolu o le masina na tuanai atu nei na tauaofia ai le fonotaga a tupu ma tamalii ma le mamalu o i latou ua ofo soifua lagolago mo lenei faamoemoe, ma tasi ai finagalo mo le laulau ua iai nei, o le a o latou faafoefoeina le sa o le Toomaga ua amata nei ona see mālie.
O le Faatonu poo le Taitaifono foi lea, o le afioga ia Toilolo Talosaga Taulapapa; o le Sui faatonu o Chantelle Afualo; o le Aao tusitusi o Christine (Lisi) Filia; o le Teuoloa o Toa Nansen, ma le Sui mo tagata ua filifilia ai Sissy Aumua.
O loo sootuli sootau‘au nei ma galulue faatasi ma le lala i le aai o Sini i Niu Sa Uelese, e faatonutonu folau i le folauga auā o le tele o lima e māmā ai le avega o tausoa, ae maualuga le faamoemoe o le fesoasoani ma le lagolago a le paia ma le mamalu o Samoa o alala ma papaaao i Melepone, i ona tupu ma e‘e, tapaau ma tuaa sinasina, tamā ma tina, uso ma tuafāfine, tainane le aufaigaluega totofi ma le nofo a ekalesia, o le a vave ai ona tupu le tama ma maua lona malosi ma avea ai o se Samoa laalaa.
E tatalo le auaunaga a le Samoa Times ina ia fālō e le Atua manoa o lo tou faleie, ina ia lautele mo ē puapugatia e mapu ane i lona paolo.
